Wir^a) Cun von gottes gnaden abt des gotzhus ze sant Gallen¹, das an alles mittel zu gehort dem stul ze Rom, veriehent offenlich mit disem brief, das fur^b) vns L kam ze Wil² in vnsers vorgenanten gotzhus statt an dem tag, als dirr brief geben ist, der beschaiden Cuntz Brenner von Linggenwil³ vnd offnot vor vns vnd sprâch, wie L das er von vns vnd vnserm vorgeschribnen gotzhus ze lehen gehebt hett ain wisen ist genampt Hoiruti⁴ gelegen in Wisan⁵ vnder der Hub⁶ vnd stosset ainhalb an des L Schenken wisan vnd stosset vndan an Hans^c) der Kinden wisun, vnd die selben wisun hab er reht vnd redlich mit allen zugehorden fur sich vnd all sin erben verkofft vnd aines staten êwigen koffes ze koffenn geben den beschaidnen Johansen vnd Hainrichen Mosern gebruder vnd Adelhaiden iro elichen swoster vnd iren erben vmb zwelfthalb pfund guter vnd Ytaliger haller, deren er och gantzlich vnd gar gewert sy vnd an sinen offenn nutz bewendet, vnd die selben Johans vnd Hainrich die Moser vnd Adelhaid iro swoster sollent die selben wisun mit allen zu gehorden vnd ir erben, ob si enwarin, nû hinnannhin haben vnd niessen an des selben Cuntzen vnd siner erben sumen vnd irrung an geuerd. Vnd do gab vns der selb Cuntz fur sich vnd all sin erben die selben wisen mit aller zu gehord ledklich vff an vnser hand vnd batt vns, die ze lihenn den egenampten Johansen vnd Hainrichen den Mosern vnd Allinen iro swoster gemainlich ze lehen. Darvmb erhortant wir da sin bett, won si vns redlich dunkt, vnd lihent die vorgeschribnen wisen mit allen zu gehorden den egenanten Johansen vnd Hainrichen den Mosern gebrudern vnd Allinen iro swoster gemainlich ze lehen mit disem brief vnd lihent inen, wz wir inen durch reht lihen sollent, vns vnd vnserm vorgenanten gotzhus an allen vnsern rehten vnd gewonhaiten gantzlich vnschadlich. Vnd ist dis beschehen vnd redlich vollfurt, als es crafft vnd maht haben sol vnd mag ietz vnd hie nah, vnd do entzeh sich och der selb Cuntz Brenner offenlich vor vns vnd enziht sich mit disem brief fur sich vnd sin erben an vnser hand gen den obgenanten Johansen vnd Hainrichen den Mosern vnd Allinen iro swoster vnd iren erben aller aigenschafft aller lehenschafft aller manschafft aller gewer aller besazzung aller kuntschafft lut vnd brief, die er oder sin erben von derselben wisen wegen gehebt hetti oder noch gehaben moht in dehain weg, aller reht vordrung vnd ansprach, die er an der vnd zu der vorgenanten wisen wegen gehebt hetti oder sin erben hie nah gehaben mohten, alles gaistlichen vnd weltlichen gerihtes, damit er oder sin erben die selben wisen iemer me mohtin angesprechen oder die egenanten Johansen vnd Hainrichen die Moser gebruder vnd Allinen ir swoster ald ir erben in dehain wis bekumberren mohten daran, an geuerd. Vnd des hiervber ze ainer warhait geben wir obgenanter abt Cun den vorgenanten Johansen vnd Hainrichen den Mosern gebrudern vnd Allinen iro swoster disen brief darvber versigelt mit vnserm insigel. Der geben ist an dem nahsten zinstag vor sant Othmars tag in dem jar, do man zalt von Cristi geburt dusent druhundert nuntzig vnd sehs jar.