Allen^a) den, die disen brief ansehent lesent oder horent lesen, kunden wir dis nachgen(anten) Johans Dietrich der elter burger ze Lindow¹, Ital Dietrich, den man nempt Muli, L vnd Johans Dietrich, den man nempt Frischhans, sin elich sun, alz der from vest Haintz von Schonenstain² dis nachgeschriben nutz vnd iarlich gelt an pfen(ningen) an habern an hunren L vnd ayern ab vnd vsser disen nachgeschribnen gutern, des ersten vsser dem kelnhof ze Roggenzell³ ain pfund siben schilling pfen(ning) vnd funfzehen malter habern Lindower messes, item L Hubli von Roggenzell von sinem gut sehs schilling pfen(ning) an dry pfen(ning) ain hun siben ayer, item der Salw von Roggenzell von sinem gut vierdhalben schilling pfen(ning) ain hun aht ayer, item Burk der Licher ze Roggenzell von sinem gut vier schilling vnd dry pfen(ning) ain hun vnd siben aiger, item Jak der Licher ze Roggenzell von sinem gut vier schilling pfen(ning) anderthalb hun vnd funf aiger, item Wernli ze Roggenzell von sinem gut ainen vnd zwaintzig pfen(ning) ain halb hun vnd vier aiger, item die guter ze Ried⁴ vnd die schupuzz ze Strodorf⁵, die buwent Claus vnd Rudi von Ried vnd Hans Fagli ze Ried, die gend ain pfund vnd siben schilling pfen(ning) vier malter vnd sehs viertal korns Lindower messes vier hunr vnd drissig aiger, item Cuntz von Regnoltz⁶ git von Schadmanswilar⁷ vnd von Regnoltz sehsthalben schilling pfen(ning), item von der Kagenegg⁷ drizehenthalben schilling pfen(ning), daz buwet Buchschor, Haintz Mark, Haintz Schnider, der Beller vnd der Wagner vnd die Fulin, item die Nider Ruti⁷ gilt ahtzehen viertal habern Lindower messes, die buwet Buchschorr vnd Buchli vnd Hagen, item die guter ze Munchbuch⁸ geltent ain pfund vnd dry schilling pfen(ning), die buwet der Brunner, Hans Buchli vnd Anna Buchlin, item die guter ze Ruti⁹ vnd ze Schwartzenbach¹⁰ vnd ze Botlinschwilar¹¹ geltent ain pfund vnd drig schilling pfen(ning), die buwet Jak Mark vnd Rudi Marken sun vnd der Veser, item die gut ze Storrenber¹² vnd ze Brugg vff dem Sumer^12a gelegen geltent funfzehen schilling pfen(ning) vnd zehen schoffel habern Rafenspurger¹³ messes, daz buwet Claus Hagen selb ander, item daz gut ze Jussenwiler¹⁴ gilt funfzehen schilling pfen(ning) ain malter habern Wanger¹⁵ messes vnd zwai vassnacht hunr, daz buwt Haintz Luti, item daz gut ze Tegrischwil¹⁶ gilt drig schilling pfen(ning) zwen schoffel habern Lindower messes vnd ain uasnacht hun, daz buwet der Huber, item des Behams gut ze Tagbrechwiller¹⁷ gilt ain pfund pfen(ning) dru malter vnd funfthalb viertal habern Lindower messes dru hunr dru vnd zwaintzig aiger, item ze Tagbrachschwiler der Nidren Reko gut gilt ainlif schilling pfen(ning) zwai malter vnd dru viertal habern Lindower messes zwai hunr vnd funfzehen aiger, daz buwet Hans Hittenwiler, item der Obren Rekko gut ze Tagbrachschwiller gilt ainlif schilling pfen(ning) zwai malter vnd dru viertal habern Lindower messes zwai hunr vnd funfzehen ayger, daz buwet och Hans Hittenwiller, item Bruchli git von sinem gut ze Tagbrechwiler ainlif schilling pfen(ning) zwai malter vnd dru viertal habern Lindower messes zwai hunr vnd funfzehen aiger, item die hub ennent bachs gilt sehsthalben schilling pfen(ning) ain malter vnd anderthalb viertal habern Lindower messes ain hun vnd siben aiger, die buwet Haintz Buman, item daz gut ze Hittenwiler¹⁸, daz Jakli buwet, gilt ain pfund vnd ainen schilling pfen(ning) vnd sehs viertal habern Lindower messes, item des Blowelmans gut ze Hittenwiler giltet ahtzehen schilling pfen(ning), daz buwet er selber, item Wolfolz gut ze dem Buflins¹⁹ gilt zwen schilling pfen(ning), dieselben nutz vnd iarlich gelt des obgenanten Haintzen von Schonenstain pfand warent von dem erwirdigen gotzhus ze sant Gallen, zu mines des obgenanten Johansen Dietrichts des eltern vnd zu miner erben handen fur sehshundert vnd sehs vnd sehtzig pfund haller in pfandes wis bracht hat mit der erwirdigen miner gnadigen herren abt Cunen von gottes gnaden vnd gemaines couents des ietzgenanten gotzhus ze sant Gallen gunst vnd willen, alz der versigelt pfand brief wol wiset, den ich dar vmb inne han. Da bekennent vnd veriehent wir alle drie offenlich mit disem brief fur vns vnd fur alle vnser erben, daz wir alle drie oder, so wir enwarent, vnser erben oder in welhes hand vnder vns dann ie daz obgenant pfand stat, den obgenanten vnsern gnadigen herren abt Cunen vnd gemainem couent des obgenanten gotzhus ze sant Gallen vnd iren nachkomen mit der losung desselben pfandes warten sollent in solicher wis vnd beschaidenhait, wenn oder welhes iares dieselben vnser gnadig herren vns oder vnsern erben, ob wir enwarent, oder welher vnder vns dann daz obgeschriben pfand inne hett, vns die losung ze vnser lieben ffrowen tag ze der liehtmiss verkundent ze hus ze hof oder vnder ogen vnd vns dann darnach vor sant Johans tag des Toffers ze sunnwendi, so nach demselben vnser frowen tag schierost kumpt, samment vnd mit ainander geben weren vnd bezalen went sehs hundert pfund vnd sehs vnd sehtzig pfund guter Italiger haller, die geng vnd gab sint, oder aber der muns, die dar fur geng vnd gab sint vnd dar mit ain kofman den andern souil geltz vngeuarlichen geweren vnd bezaln mag ze Costentz in der statt oder ze sant Gallen in der statt, ob haller vnwert vnd abgesetzt wurdent, daz wir oder vnser erben, ob wir enwarent, vns dann desselben geltes an allen furzug vnd widerred sollent lassen weren vnd bezaln, vnd sont inen der losung an alles verzihen vnd widerred gestatten vnd inen vnd dem obgenanten gotzhus ze sant Gallen dann zestett die vorgeschribnen nutz vnd jarlich gelt^b) an pfen(ningen) an habern an hunren vnd an aygern ab vnd vsser den obgenanten gutern ledig vnd los lassen, vnd sont inen och den obgenanten pfandbrief, den wir dar vmb inne hand, vssher geben vnd zu iren vnd des obgenanten ires gotzhus handen ze stett inantwurten, vnd sollent darwider in dehain wis nit reden noch tun noch inen daz in dehain wis verziehen. Lostin aber si dehaines jares nach dem obgenanten sant Johans tag ze sunnwendi, so solti doch mir obgenantem Johansen Dietrich dem eltern oder minen erben, ob ich enwar, der nutz vnd iarlich gelt, alz vorgeschriben stat, von demselben jar vnd nit mer noch furbaz gantzlich geuallen vnd dann dar nach aber dem obgenanten abt Cunen vnd gemainem couent vnd iren nachkomen vnd dem obgenanten irem gotzhus ledig vnd los sin, vnd sollent inen den obgenanten pfandbrief vssher geben vnd zu des gotzhus handen an allen furzug inantwurten. War aber, daz wir oder vnser erben dehaines jares inen der losung also nit gestatten vnd vns der sperren oder dar wider reden wolten vnd vns doch die losung verkund ware vff daz zil, alz vorgeschriben stat, so sont vnd mugent die obgenanten vnser gnadig herren oder ir nachkomen die vorgenanten sehs hundert vnd sehs vnd sehtzig pfund haller oder der muns, alz vorbeschaiden ist, vor dem obgenanten sant Johans tag des Toffers gantzlich vnd gar legen gen Costentz in die muns oder gen sant Gallen in die muns ze vnsren handen oder zu vnsrer erben, ob wir enwarent, oder zu des handen, welher dann vnder vns daz obgenant pfand inne hat, vnd sont dann dar mit die vorgenanten nutz vnd iarlich gelt an pfen(ningen) an habern an hunren vnd aygern ab vnd vsser den obgenanten gutern inen vnd irem gotzhus gantzlich vnd gar ledig vnd los sin, vnd solt och dar mit der obgedaht pfandbrief, den wir ietzo inne hant, vns vnd allen vnsern erben gantzlich vnd gar ab tod vnkreftig vnnutz vnd alleklich verniht sin an allen sinen puncten artikeln vnd mainungen an allen den stetten, da wir oder vnser erben denselben brief furbietent vnd zogent vff gaistlichen vnd vff weltlichen gerichten vnd vssrent den gerichten allenthalben, vnd sol inen noch dem obgenanten gotzhus ze sant Gallen dehainen schaden mer bringen. Vnd des alles ze offem vrkund vnd staten waren sicherhait so haben wir obgenanter Johans Dietrich der elter, Ital vnd Johans Dietrich sin elich sun alle drie vnsru insigel fur vns vnd vnser erben offenlich gehenkt an disen brief. Der geben ist an der nahsten mitwochen nach sant Nyclaus des hailgen byschofs tag, do man zalt von Cristi geburt druzehenhundert vnd nuntzig jar, dar nach in dem sehsten jar.