Ich^a) Johans Eggrich Bartholomes Eggrichs saligen êlicher sun burger ze sant Gallen tun kûnt vnd vergich offenlich mit disem brieue fur mich vnd fur alle min êrben vnd nâchkomen L allen, die in sehent lesent oder horent lesen, daz ich vss guter vorbetrachtûng vnd mit wolbedachtem mute disu nachgeschribenn jârzit vff disu guter, die hie nâch benempt L sint, geordnot vnd geschlagen han mit samlichem vnderschaid vnd in den rechten, alz hie nâch geschriben stât vnd mit worten beschaiden ist. Item dez êrsten so han ich geordnot L vnd gesêtzt zu mines ênis Johansen Êggrichs saligen jârzit, daz jarlich gefallet ze mitte(n) aberêllen, vierdhalben schilling phenning ie zwen gut geng haller fur ainen Costenzer phenning ald aber samlich geng munse vnd werschaft jarlich dâ fur, die ie ze den ziten, alz daz selb gelte gefallen sol, ze sant Gallen in der statt fur also vil geltes geng vnd genam ist, jarlichs vnd ewigs geltes ab minem vnd von minem hus hofraiti vnd garten gelegen ze sant Gallen in Irer vorstatt¹ obernthalb sant Mangen Brûnnen², daz ainhalb stosset an Johansen von Sûmbri³ hus vnd hofraiti, andert an Hainrichs Smids von Zilschlat⁴ hus vnd hofraiti vnd ze der dritten syten an den graben, der vmb die vorstat gat, mit dem gedinge vnd in den rechten, daz alle die, die daz selb vorgeschriben min hus hofraiti ald garten nû hinnenhin von mir oder von minen erben ald nachkomen iemer mêr habent ald niessent oder denen es von vns verlihen ald beuolhen wirt, iemer mêr eweklich vnd aller jarlich ie ze mitte(n) aberêllen ze dez egenempten mines enis Johansen Eggrichs saligen jârzit durch siner sêle hailes willen vierdhalben schilling phenning der vorgeschribenn munse zu aines lutpriesters ze sant Mangen⁵ handen ân alle minrûnge ân allen abgang vnd ân alle widerrêde geben richten vnd antwurten sullent ân allen sinen schaden ze sant Gallen ân alle gefarde. Vnd wer der ist, der ie denn ze sant Mangen lutpriester ist ald die selben kilchen besinget, der sol die selben egedachten vierdhalben schilling phenning jarlich in nemen vnd enphahen vnd sol die zertaillen vnd vsgeben an diz nâchgeschribenn stett. Item er sol geben drij phenning gen sant Othmar⁶, drij phenning gen sant Johans⁷, drij phenning gen sant Laurecien⁸, drije phenning gen Vnser frowen kappell⁹, drij phenning zem Hailgen Grab¹⁰, drij phenning gen sant Peter¹¹, drij phenning gen Saluator¹² vnd zer Tunklen kappell¹³, drij phenning gen sant Oswalt¹⁴, drij phenning vffen spittal drij phenning gen sant Lienhart¹⁵, drij phenning gen sant Fyden¹⁶, drij phenning an daz Linsibul¹⁷ vnd sechs phenning im selber, vnd dar vmb daz er daz gelt in nimpt vnd vsgit, dar vmb sullent im der drijer phenning mê werden denn ainem andern. Vnd dar nach von dem selben hus vnd hofraiti sol aber gân ain schilling phenning der vorgenanten munse an daz lieht ze sant Mangen iemer eweklich vnd aller jarlich ie ze hêrbst in den selben rechten, alz hie vor vnd hie nach an disem brieve geschriben stat. Vnd aber dar nâch so han ich gesêtzt vnd geordnot zu mines vatters Bartholomes Êggrichs saligen jârzit, daz jarlich gefallet vff sant Paulus tag, alz er bekert wart, funf schilling phenning der vorgeschribenn munse och jarlichs vnd êwigs geltes ab minem vnd von minem gute am Holenweg², daz vnnen stosset an den Rodmonten¹⁸ vnd andert an der Hafner guter, von hus von hof vnd von allen sinen zugehorden, och mit dem gedinge vnd in den rechten, daz alle die, die daz selb ietzgedâcht gute nû hinnenhin von mir oder von minen êrben ald nâchkomen iemer mêr habent ald niessent oder denen es von vns verlihen ald beuolhen wirt, iemer mêr êweklich vnd aller jarlich ie vff sant Paulus tag, alz er bekêrt wart, daz ist siben tag vor vnser frowen tag ze der liehtmesse, zu dez obgenanten mines vatters Bartholomes Êggrichs saligen jârzit durch siner sele hailes willen funf schilling phenning der vorgeschribenn munse zu dez obgenanten lutpriesters ze sant Mangen handen ân furzûg ân allen abgang vnd ân alle widerrêde geben richten vnd antwurten sullent ze sant Gallen in der statt an allen sinen schaden ân gefarde. Vnd wer der ist, der ze sant Mangen lutpriester ie denn ist, so daz selb gelte gefallen sol vnd die selben kilchen denn ze mâle besinget, der sol och denn die selben egeschribenn funf schilling phenning in nemen vnd enphâhen vnd sol die zertaillen vnd vsgeben an diz nâchgeschribenn stett. Item er sol geben gen sant Othmar vier phenning, gen sant Johans vier phenning, gen sant Laurencien vier phenning, gen vnser frowen kappel vier phenning, zem Hailgen Grab vier phenning, gen sant Peter vier phenning, gen sant Gallen kappel¹⁹ vier phenning, gen Saluator vnd zer Tûnklen kappel vier phenning, gen sant Oswalt vier phenning, gen sant Lienhart vier phenning, gen sant Jacob²⁰ vier phenning, gen sant Fyden vier phenning vnd sol im selber behaben sechs phenning vnd sol denn geben der klosnerinen ze sant Georien²⁰ ain phenning, der klosnerinen ze sant Lienhart ain phenning, der klosnerinen ze sant Johans ain phenning, den zwaien klosnerinen ze sant Jacob zwen phenning vnd der klosnerinen ze sant Mangen ain phenning. Vnd ware, daz in den vorgedâchten klosnen dehainer ain klosnerin dehaines jâres nut dâ war, so sol der obgenant lutpriester daz almusen, daz in die selben klosen gehort hett, siner klosnerinen ze sant Mangen geben. War och, daz dehaines jâres vff disen vorgenanten kilchen ald kappellen vff ainer besûnder ald vff mê dehain priester war, der disu vorgedâchten jârzit nut in nemen vnd begân wolt, an welhen stetten daz war, so sol es der lutpriester ze sant Mangen, der daz in nimpt vnd vsgit, daz selb oder die selben jârzit, wie vil ir ist, vnder arm lute zertaillen vnd denen geben, wie in gotlich vnd gerecht dûnkt, ân alle gefarde. Ich han och die vorgeschribenn guter vsser fryem gute(n) willen darzu gebûnden vnd bind su mit disem brieue fur mich vnd fur alle min erben vnd nâchkomen, daz alle die lutpriester ze sant Mangen, die iemer mêr dar koment oder wer der ist, der die selben kilchen besinget vnd mit gotes dienst versiht, iemer mêr eweklich von ainem an den andern disu vorgeschribenn jârzit in nemen vnd enphâhen sont von disen vorgeschribenn gutern vnd von denen, die du selben guter von mir ald von minen êrben oder nâchkomen habent ald niessent. Vnd sullent och die selben jârzit zertailt vnd vsgeben werden an die stette vnd in den rechten, alz dâ vorgeschriben stât vnd mit worten beschaiden ist. Vnd hant och gut recht vnd vollen gewalt, die dâr vmb ie nach den vorgeschribenn ziln ze notenn vnd anzegriffenn, die vff den vnd in den vorgschribenn gutern sint vnd von mir ald minen êrben oder nâchkomen habent ald niessent mit gaistlichem vnd mit weltlichem gerichte vnd mit andern sachen, alz vil vnd alz dik, vntz die vorgeschribenn jârzit vnd aller der schade, der dâr vf geloffen war, wie ald von waz sachen sich daz gefuget hett, gantzlich vnd gar gewert vnd vsgericht wirt ân allen abgang ân gefarde. Vnd ze offenem wâren vrkunde vnd stater sicherhait aller dirre vorgenanten dinge vnd vergicht so han ich vorgenempter Johans Êggrich min aigen insigel fur mich vnd fur alle min êrben vnd nâchkomen offenlich an disen brief gehenket. Der geben wart ze sant Gallen in dem jâre, do von Cristi geburt wârent druzehenhûndert vnd nunzig jâr vnd dar nâch in dem sibenden jâre, an dem zwelften âbent in den wihennahten.