Ich^a) Cunr. Stosser ain fry lantrihter in der Piers¹ von minez gnadigen herren dez Romschen L kung Wentzlaus gwalt vnd von dez durchluhtigen hochgeboren fursten vnd herren L herren Stefan von gotz gnaden phallentzgraf bi Rin hertzog in Paigern² lantuogt L ze Swauben tun kunt mit disem brief, daz den wisen wolbeschaiden burgermaister rat den burgern gemainlich diser stett Kostentz, Vberlingen³, Rauenspurg⁴, Lindow⁵, sant Gallen, Wangen⁶, Buchorn⁷ vor mir mit gemainer vrtail ertailt ist, das ich gebieten sol vnd gebut och von lantgerihtz wegen festklich den burgern gemainlich diser stett Pregentz⁸, Velkirch⁹, Kur¹⁰, Bludentz¹¹, Altstetten¹², Maienueld¹³, Werdenberg¹⁴, Sant Gauns¹⁵, Rinegg¹⁶ da zu allen, den diser brief geofnot vnd kunt wirt, es si vf burgen in stetten vf dem land, wan vnd wie si genant vnd gesessen sind, das ir Purkart Nagel genant Schell weder husen noh hofen noh ze essen noh ze trinken geben noh dehain gemainsammni mit im haben in kain wis noh in iwwern^b) zwingen noh bannen nit entalten, dar vmb won er von der obgenanten stett klag wegen, die si zu im mit dem rehten volfurt hand, ain offen verschriben ahter ist, vnd wer dar vber dis gebott nit haltet, dem diser brief geofnot vnd kunt wirt, kumpt das ze klag, man riht es da hin nah reht. Des ze urkund henk ich dis gerihtz insigel an disen brief. Der geben ist ze Lindow vor lantgeriht mit vrtail vnd mit reht am nahsten fritag nah sant Agnesun tag nach gotz geburt druzehenhundert vnd suben vnd nuntzig jar.