Ich^a) Vlrich ab der Kachtelstatt¹ der êlter, den man nemmet der Tailweber, Vlrichs Bysers, den man nemmet Vli ab der Kachtelstatt, êlicher sûn tun kûnt vnd vergich offenlich mit disem L brieue fur mich vnd fur alle min êrben allen, die in sehent lesent oder horent lesen, daz ich mit wolbedâchtem mute von den wisen wolbeschaidenn Vlrichen Rudger, Johansen L Êggrichen vnd Johansen Iten von Oberndorf² phleger vnd maister der siechen dez spittals ze sant Gallen³ recht vnd rêdlich enphangen han den akker vnd daz gute gelegen L an der Kachtelstatt, daz man nemmet dez Kolers akker, mit grûnd mit grât mit stok mit stain mit wasen mit zwi mit allen rechten nutzen vnd gewonhaiten vnd mit allen den zugehorden, so dârzu vnd dâr in gehorent vnd vntzher gehort hant, vnd enphah von inen mit disem brieue den selben ietzgedâchten akker mit aller zugehorde mir vnd alle minen êrben frowen alz mannen tochtern alz knaben, vss gelâssen aigenen luten, die von den liben aigen vnd nut gotzhus lute sint, ze ainem rechten rêdlichen êrbzinslêhen vmb ainen staten zins, mit samlicher beschaidenhait vnd den rechten dinge vnd gedinge, daz ich vnd alle min êrben den vorgeschribenn akker mit aller zugehorde in êren vnd vnwustlich haben vnd niessen sullent, vnd sullent dem vorgeschribenn spittal dâ von aller jarlich ie ze sant Martins tag ain phûnt phenning ie zwen gut geng haller fur ainen Costenzer phenning ald aber samlich geng munse vnd werschaft dâ fur, dâ mit ain êrber man den andern ze sant Gallen ie ze den ziten, alz dirre selbe zins gefallet, vngefârlich also vil geltes geweren mag, ze rechtem jarlichen zins ân furzug ân allen abgang ân alle minrûnge vnd ân allen dez selben spittâls vnd siner phleger schaden geben richten vnd antwurten ze sant Gallen in der statt, vnd welhes jâres ich oder min êrben dem obgedâchten spittâl den vorgeschribenn zins nut richtint vnd gabint gantzlich vnd gar ze den ziln vnd in den rechten, alz dâ vor geschriben stât vnd mit worten beschaiden ist, so sullent dez selben spittâls phlegern iro botten vnd iro helffern, wer die sint, dâr vmb erlobt sin, minu vnd miner êrben phênder vff dem lande vnd in den stetten mit gericht vnd ân recht ân klag vnd ân zorn uber alle fryhait vnd gewonhait uber alles burgerrecht vnd uber allu recht vnd gesetzt der herren vnd der stetten gaistlichs vnd weltlichs gerichtes, vntz daz der selb spittâl vnd sin phleger also vil zins, alz sich denn ergangen hett vnd gefallen war, vnd alles dez schaden, der dâr vf geloffen war, wie ald von waz sachen sich daz gefuget hett, gantzlich vnd gar gewert vnd vsgericht werdent. Beschah aber, daz sich der selb vorgeschriben zins alz vil vnd alz lang verzug, daz ain zins den andern vnd ain sant Martins tag den andern erlangiti vnd begriffe, es ware daz inen ain tail dez selben zins oder gar wênig oder vil vssgestanden vnd nut worden war, daz den andern zins erlanget vnd begriffen hett, so ist vnd sol der vorgeschriben akker mit aller zugehorde dem obgedâchten spittâl vnd sinen phlegern zu dez selben spittals gewalte nûtz vnd handen zinsfellig vnd gantzlich vnd gar ledig vnd los sin vnd haissen vnd vnansprachig êweklich beliben von aller manglichem ân alle gefarde. Ez ist och ze wissenn, daz diz vorgeschribenn zins funfthalb schilling phenning an daz lieht in den vorgedâchten spittal gehorent. Ez ist och bedinget vnd berêdt worden, ware daz ich ald min êrben die vorgeschribenn minu recht dez obgedâchten êrbzinslêhens dehaines jâres verkoffen vnd dâ von gân woltint, so sullen ich vnd min êrben die selben vnsru recht dez egeschribenn spittâls phlegern dez êrsten vail bieten vnd vor manglichem ze koffenn geben funf schilling phenning der vorgeschribenn munse naher vnd bas denn iemant andre, ob su sie koffen wollent. War aber, daz su die selben minu recht nut koffen woltint ald mohtint, so mûgent ich vnd min êrben die selben vnsru recht wol ze koffenn geben ân aignen luten, wem wir wollent, doch in samlicher mâsse, daz dez vorgenanten spittâls phleger, wer die sint, den selben koff dennoht wol funf schilling phenning naher vnd baz, denn wirs verkofft hettint, zu dez obgedâchten spittâls handen nemen mûgent, ob su wollent. War aber, daz su den selben koffe in den ietzgedâchten rechten nut haben woltint, so sont su mich vnd min êrben an dem selben verkoffenn vngesûmt vnd vngeierrt lâssen, doch iro rechten vnd dez selben spittâls rechten vnschadlich, vnd wem ich ald min êrben die selben vnsru recht ze koffenn gebent, dem sullentz dez vorgeschribenn spittals phleger lihen vmb den zins vnd in den rechten, alz an disem brieue geschriben stât vnd mit worten beschaiden ist, vssgelâssen aigen lute, die von den liben aigen vnd nut gotzhus lute sint, den sullent su niht gebûnden sin, der vorgeschribenn rechte iht ze lihenn. War aber, daz dez vorgeschribenn spittals phleger dez selben spittals recht dez vorgeschribenn akkers dehaines jâres verkoffen woltint, so sullen mir vnd minen êrben gen dem selben spittal vnd gen sinen phlegern die selben recht behalten sin, die su gen mir hant, ze glicher wise vnd in aller der mâsse, alz dâ vor geschriben stât vnd mit worten beschaiden ist. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so han ich vorgenempter Vlrich ab der Kachtelstatt, won ich aigens insigels nut hatt, mich willeklich gebûnden vnder dez êrbern wolbeschaidenn Vlrichs Toppelstains mines swagers insigel, der daz selbe sin insigel von miner ernstlicher bette wegen fur mich vnd min êrben offenlich an disen brief gehênket hât, dez och ich ietzgenempter Vlrich Toppelstain vergich mir vnd minen êrben gantzlich vnschadlich. Diz beschach vnd wart dirre brief geben ze sant Gallen in dem jâre, do von Cristi geburt wârent druzehenhûndert vnd nunzig jâr vnd dâr nâch in dem sibenden jâr, an dem nahsten zinstag nach sant Agnesen tag in dem genner.