Dem^a) hohwirdigen ffursten hern Cunen abt des gotzhus ze sant Gallen¹ minem gnadigen herrn L tun ich Nicolaus Rupreht stattamman ze sant Gallen² kund vnd ze wissent, dz Margareth L Kellerin von Richenswilr³ Johansen Roschachs von Horn⁴ elichi wirtinn fur mich kam ze sant Gallen L in der statt, do ich offenlich ze geriht sass, vnd nam ze ffursprechen Cunr. Sarrin vnd beuogtet sich mit des egenanten irs elichen mannes willen mit Johannessen Wildr(ich) uwerm schriber vnd stalt sich, wie reht was, vnd offnot do vor mir in geriht mit dem egeschr(ibnen) irm fursprechen, dz si den hof genamt Richenswilr, der von uch vnd dem egeschr(ibnen) uwerm gotzhus ze sant Gallen ir lehen wari, mit allen sinen zugehorden vntz an vier malter kornes jarlichs vnd ewigs zinss, die ir darus giengint vnd och gan soltint, vnd vntz an die jarlichen herren vnd gotzhuser zins, die dar ab giengint, reht vnd redlich verkofft vnd ze koffen geben hetti Nicolausen Nahtbrant von Tunbach⁵ vmb hundert vnd zwai pfund haller, vnd denselben hof Richenswilr wolti si dem egeschr(ibnen) uwerm schriber vfgeben, vnd gab im och den ze stund vf zu sinen handen, wie reht was, in der beschaidenh(ait), dz er den^b) ze uwern handen brahti vnd vfgabi vnd uch danne genâde bati vnd och bitten solti, dz ir denselben hof luhint ze lehen dem egen(amten) Nicolausen Nahtbrant vnd siner elichen wirtinnen^c), vnd sent uch och denselben hof bi dem egeschr(ibnen) uwerm schriber vnd och mit disem brief vf^d) ze uwern gnaden vnd handen, als vorgeschr(iben) stat. Des alles ze offem warem vrkund truk ich min aigen insigel mit vrtail vff disen brief. Ich Margar(eth) Kellerin vergich ain gantz warhait aller vorgeschr(ibner) ding, und ze merer sicherhait derselben ding han ich erbetten den egeschr(ibnen) Cunr. Sarrin, dz er sin insigel fur mich vnd min erben getrukt hât vff disen br(ief) im vnd sinen erben vnschadlich. Dat. apud sanctum Gallum sabbato ante Agathe virginis, anno domini M^mo CCC^mo LXXXX septimo.