Allen^a) den, die disen brief ansehent oder horent lesen, kund ich Heinrich Turbis genant Molitor vogt der statt ze L Rapreschwil¹ vnd vergich offenlich mit disem brief, dz fur mich kament fur offenn gericht an offner fryer strasse L fro Agnes von Steinach² mit Hansen Biderman ir erkorne(n) vogt vnd fro Elsbeth Russingerin³ ir schwoster L ze einem teil vnd Walther Fusting von Mêrwile⁴ an statt vnd in namen sin selbes, Kathrinen siner elichen wirtin, Machthilten siner schwoster, Cunratz siner schwoster sun vnd Vrsellen des selben Cunratz elicher wirtin ze dem andern teil. Vnd offnotenn die vorgenanten frowen mit ir fursprechen, dz sy fur sich vnd ir erben recht vnd redlich ze koffenn geben habint den vorgenanten Walther Fusting siner elichen wirtin vnd den andren, die dauor benempt sint, dz gut, dz man nempt die Oberhub⁵, mit ehofstetten mit bôngarten mit aker mit wisen mit holtz mit veld mit wunn mit weid mit steg mit weg vnd mit allen rechten vnd zugehorden, gelegen zwuschenn dem dorff ze Merwile vnd dem hus ze Tobel⁶, vnd stosset einhalb an des Risen gut von Wile⁷ vnd ist ledig eigen. Vnd herumb hant die obgenanten frowen enpfangen in eins rechten redlichen koffes wise von dem obgenanten Walther Fusting vnd von den andern, die zu im in disem koff behafft sint, acht vnd drissig pfunt pfenning genger vnd gaber Costentzer munsz, die in ir guten nutz komen sint, als die selben frowen vor gericht veriachent. Darnach offnot die vorgenant fro Elsbeth Russingerin, dz sy ir vogt Wernlin Giel⁸ nu zemâl bi diser fertgung niht gehaben mocht, doch so war diser koff beschehen mit sinem rât wissen vnd guten willen. Dar zu wolt sy och schaffen, dz er sin insigel hankti in vogtz wise an den brief, so von diser fertgung wegen geschriben wurde. Vnd nach diser offnung fertgotent die obgenanten frowen fro Agnes von Steinach mit Hansen Biderman ir erkornen vogt vnd fro Elsbeth Russingerin dem obgenanten Walther Fusting an statt vnd in namen sin selbes vnd der andren, die zu im gehorent in disem koff, als vor ist bescheiden, dz vorgenant gut mit aller zugehord vnd entzigent sich daran aller vordrung vnd ansprach vnd loptenn beid vnuerscheidenlich mit guten truwen fur sich vnd ir erben, des selben gutz mit aller zugehord wêr vnd troster ze sin fur ledig eigen, vntz daz den vorgenanten Walther Fusting sin elich wirtin sin schwoster siner schwoster sun vnd des elich wirtin oder ir erben ein gewêr dabi schirmet, vnd dz sy daran habent sint nach gewonheit vnd recht des landes an geuerde. Vnd beschach dis alles also an des gerichtz stab mit allen den worten vnd werchen, so darzu hort vnd notdurfftig waz vnd als gericht vnd vrteil gab, wenne der vorgenant Wernli Giel sin insigel in vogtz wise hankti von der obgenanten Elsbethen Russingerinen wegen an den brief, der vber dis fertgung gemachet wurde, dz es denn billich krafft vnd macht hetti nu vnd hienach. Vnd des allez ze warem vrkund haben wir die vorbenempten ich Heinrich Molitor vogt min eigen insigel von des gerichtz vnd von beider teil bett wegen, wir Agnes von Steinach vnd Elsbeth Russingerin vnser ietwedru ir eigen insigel fur vns vnd vnser erben vnd wir die vorgenanten Hans Biderman vnd Wernli Giel vnser ietwedra sin eigen insigel in vogtz wise, ich Hans Biderman von fro Agnesen wegen von Steinach vnd ich Wernli Giel von miner lieben mumen Elsbethen Russingerinen wegen, die disen koff vnd fertgung mit minem willen vnd gunst getan hat, offenlich gehenkt an disen brief. Der geben ist an dem nachsten samstag vor sant Gregorien tag nach Crists geburt drutzehen hundert vnd nuntzig jar, darnach in dem sibenden jare.