Ich^a) Burkart Nagel, den man nempt Schell, vnd ich frow Margareth Vnraini geborn von Ratzenriet¹ sin L elichu wirtinn tund kunt, als vns die fursichtigen wisen des hailgen Romischen richs stett mit namen Costentz, L Vberlingen², Rauenspurg³, Lindow⁴, sant Gallen, Wangen⁵ vnd Buchorn⁶, die den bund mit ainander haltend vmb den L Sew⁷, vorziten die vesti Schonstain⁸ angewunnen vnd die gebrochen vnd gsechlaipfft hand, darumb wir aber mit den vorgenanten stetten bericht sind, als das der richtung brief aigenlich wisdt vnd sait, der darumb geben vnd geschriben ist, vnd als wir noch etlich lut vnd guter vmb Schonstain ligend hand vnd die ouch da hin gehorten, bekennen wir an disem brief, also war das wir zu den egenanten stetten allen gemainlich ald zu dehainer besunder ald dehain der iren nu furbass hin dehain stoss ald zuspruch von der vorgedachten lut vnd guter wegen, wie die genant sind, an allain vssgenomen Schonstain die vesti, die si gebrochen hand, yemer gewunnen ald hetten, oder war das si ald yeman von iro wegen dehain vordrung oder zuspruch zu vns maintind ze haben, wenn das geschach, es war uber lang oder uber kurtz, die selben stoss sond allzit vor den obgenanten stetten berechtot vnd vssgetragen werden, also das es entweder tail niendert anderswa hinziehen sol by der gelupt vnd truw, so wir zu baider sitt getan haben, vnd wer das wir von der selben vnser lut ald guter wegen vor den egenanten stetten rechten wurdint, da sullen si den vorgedachten richtung brief nit furziehen noch darinne ze wort haben, won das si vns das recht sond lassen volgan vnuerzogenlich, vnd sol doch der selb richtung brief in sinen kreften von der vesti Schonstain vnd von der richtung wegen, als er wisdt vnd sait, nu vnd iemer beliben. Vnd des ze vrkund so hab ich obgenanter Burkart Nagel vnd ouch ich die vorgenant frow Margareth die Vnrainin sin elichu wirtinn vnsru aignu insigel offenlich gehenkt an disen brief. Der geben ward an mitwochen nach sant Gregorien tag in dem jar, do man zalt von Cristus geburt drutzehenhundert jar vnd darnach in dem siben vnd nuntzigosten jar.