Wir dis nachbenempten Oswalt Folki ze disen ziten sesshafft ze Tegerwille¹ vnd Margretha sin elichi husfrow tun kunt vnd verjehen offenlich mit disem brieff allen, die in sechent oder horent lesen, das wir mit guter vorbetrachtung vnd wolbedachtem mut von den wisen wolbescheiden Vlrichen Rudger, Joh. Eggrichen vnd Joh. Iten von Oberdorff² pfleger vnd meister des spitals ze sant Gallen³ recht vnd redlich enpfangen haben das gutli ze Tegerwil gelegen, das des vorg(eschriben) spitals ist, mit hus mit hoff mit rebwachs mit aker mit wisen mit holtz mit veld mit wunn mit weid mit wasen mit zwy mit allen rechten nutzen vnd gewonheiten vnd mit aller zugehorden, vnd enpfahend mit disem brieff das selb egenant das gutli ze Tegerwil vns vnd vnsern erben frowen vnd mannen tochtran vnd knaben, vssgelassen gotzhusern clostern pfaffen munchen nunnen vnd eignen luten, die von den liben eigen sind, ze einem rechten erbzinslehen vmb einen staten zins mit dem geding vnd in dem rechten, das wir vnd vnser erben dz vorg(eschriben) gutli ze Tegerwil an reben an tach an zimbrinen vnd mit allen sinen zugehorden in eren vnd vnwustlich haben vnd niessen sond, vnd sond dem vorg(eschriben) spital vnd sinen pflegern zu desselben spitals handen darab vnd da von ewenklich jerlich vff sant Martis tag funff mut gutz vngeuarlich kernes Cost(entzer) messes zwen mut gutes habern desselben messes vier hunr vnd funffzig eyer ze rechtem jerlichem zins an furzug an alle minrung geben richten vnd antwurten ze Costentz in der stat an ir schaden an geferd, vnd haben ouch dem vorg(eschriben) spital ze erschatz darumb geben dru pfund pf(enning) Cost(entzer) muntz, der si gantz bezalt sind, vnd welhes jars wir ald vnser erben dem vorg(eschriben) spital ald sinen pflegern ald ir gewissen botten den obg(eschriben) zins nit gebend ze den zilen vnd rechten, als vor geschriben ist, so hand si vnd ir helffer gut recht vnd vollen gewalt, je desselben jares nach dem obg(enanten) zil, wenn si wellent, vns vnd vnser erben ze pfenden angriffen an allen vnsern gutern vff dem land vnd in stetten mit gericht vnd an recht, wenn wo vnd wohin si das getun mugend vnd wellent, uber alle fryheit vnd gewonheit uber alle buntnisse uber alles burgrecht uber alle recht vnd gesetzte der herren der stett vnd der lantluten geistlichs vnd weltlichs gerichtz, als vil vnd als dik, vntz das der selb spital vnd sin pfleger des vorg(eschriben) zins vnd alles des schaden, der dar vff gelouffen wer, wie ald von was sachen sich dz gefugt het, gantz vnd gar gewert vnd vssgericht werdent. Es ist ouch bedinget vnd berett worden, were das wir ald vnser erben dz vorg(eschriben) gutli ze Tegerwil an reben zimberen an tach ald an andren sinen zugehorden wustlich vnd nit in eren hettind, wo ald wenn das des vorg(eschriben) spitals pfleger ald besorger erfragend ald erfarend, so mugen si vns vnd vnser erben darumb ermanen, vnd nach der ersten manung so sond wir bi den truwen, als wir baidi fur vns vnd vnser erben darumb gelopt habend, vnuerzogenlich an widerred darzu keren vnd ein erbern man darzu bitten vnd nemen sond, vnd sollend ouch desselben spitals besorger ald botten einen erbern man darzu nemen vnd bitten, vnd die selben zwen man sollent vnd mugent einen dritten man zu inen nemen, der zu der sach nutz vnd from sige, vnd wes sich die selben drig man darumb erkennent, dz wir vff dem vorgeschriben sant Galler spitals gutli ze Tegerwil gelegen an reben an zimbern an tach ald an andren sinen zugehorden, wie die genant sind, bessern sond, vnd wz si vns dar vmb der merteil vnder in heisset, dz sond wir vngeuarlich an widerred vnd an furzug bessern. Tatin wir oder vnser erben das nit, so hand des vorg(eschriben) spitals besorger ald sin botten, wer die sind, darnach, wenn si wend, gut recht vnd vollen gewalt, das vff vnsern schaden ze bessern, wie sich die drig man erkendt hand, vnd wie si des ouch denn ze schaden koment, von dem selben schaden allen sollen wir vnd vnser erben den vorg(eschriben) spitale vnd sin pfleger vnd botten, wer die sind, gantz vnd gar losen vnd entrihen, als wir inen fur vns vnd vnser erben gelopt hand, vnd sollent inen ouch vnsri pfender dar vmb erloubt sin ze glicher wis vnd in allen den rechten als vmb den obg(eschriben) zins als vor stat vnd bescheiden ist, als vil vnd als dik, vntz die vorg(eschriben) bessrung an ir schaden gantzlich volfurt wirt vnd darzu gantzlich vssgerich werdent alles des schaden, der dar vff gangen wer, an geuerd. Es ist och mer bedinget worden vnd haben ouch dz vorg(eschriben) gutli von des obg(enanten) spitals pfleger enpfangen in den rechten vnd mit dem gedinge, das alle vnser erben vnd nachkomen dasselb gutli ze Tegerwil gelegen von des obgeschriben spitals pfleger, wer die sind ald werdent, nach tod vnd nach koiffen mit einem pfund gutz vngeuarlichs pfeffers Cost(entzer) gewicht ze erschatz vnd ze handlosung vnd an widerred sond enpfahen inrent den nechsten zwein ma­noten, nach dem vnd es vss einer hand in die andren kunt vnd gefalt, als dik es ze schulden kunt, an geuerd, vnd sollent ouch vnser willig lehenherren darzu sin, vnsern erben vnd nachkomen das ze lihen vmb den zins vnd in den rechten, als vorgeschriben statt vnd mit worten bescheiden ist, doch vssgelassen gotzhuser closter pfaffen munchen nunnen vnd eigen luten, den sond si nicht gebunden sin, der selben vnsern recht des vorg(eschriben) gutlis icht ze lihen, vnd sond ouch dehein vordrung zuspruch noch reht zu dem selben gutli noch zu deheiner siner zugehorde nit enhan noch niemer gewinnen an geuerd. Wir haben ouch vns gen dem vorgeschriben spital vnd gen sinen pflegern des willenklich gebunden vnd binden vns vnd vnser erben mit disem brieff, wer dz wir vnd vnser erben die vorg(eschriben) vnsri recht des egedachten erblehens deheines jares verkouffen woltind, so sollen wir si des obgenanten spitals pflegern vor mengklichem ze kouffen geben funff schilling pf(enning) Cost(entzer) muntz neher vnd bas denn jeman anders, ob si die kouffen wellent, tatind wir oder vnser erben des nit, wo ald gen wem wir denn die selben vnsri recht verkoufftind ald verkouffet hettind, so hand desselben spitals pfleger vnd botten gut recht vnd vollen gewalt, desselben kouff ze versprechen, wenn ald vber wie uil zites si das erhaischent, vnd den kouff zu des selben spitals gewalt nutz vnd handen ze nemen vnd ziehen aber funff schilling pfenning der vorgeschriben muntz neher vnd bas, denn wir si verkoufft hettind. Wer aber dz sy nit kouffen woltind, so sond si denn vns dannenhin an dem selben kouff vngesumpt vnd vngeirt lassen vnd dero willig lehenherren dar vmb sin, denen wir ze kouffen geben hettind, vmb den zins vnd in allen den rechten, als an disem brieff geschriben stat vnd mit worten bescheiden ist, doch aber vssgelassen gotzhuser closter vnd die lut, als da vor bescheiden ist, den sond si nit gebunden sin, der selben recht icht ze lihen ald dar vmb ze antwurten, an alle geuerd. Desselben glich ist vns ouch behalten gen dem vorg(eschriben) spital vnd sinen pflegern, ob si das vorg(eschriben) gutli verkouffen woltind, dz vns dz geziehen vnd werden sol, ob wirs kouffen mugend ald wellend, ze gelicher wis vnd in allen den rechten, als da vorgeschriben statt vnd mit worten bescheiden ist. Vnd ze offem warem vrkund vnd stater sicherheit aller vorg(eschriben) ding vnd geding so haben wir vorgenanten Oswalt Folki, Margretha sin elichi husfrow, won wir eigen insigel nit hatten, vns williklich gebunden vnder des wolbescheiden Wernher Ehingers insigel burger ze Costentz, der das selb sin insigel von vnser beider ernstlicher bette wegen fur vns vnd vnser erben offenlich an disen brieff gehenkt hatt, des ich ouch obgenanter Wernher Ehinger offenlich vergich mir vnd minen erben gantzlich vnschedlich. Dis beschach vnd ward diser brieff geben ze Costentz in dem jar, do von Cristi geburt warent druzehundert vnd nuntzig jare vnd darnach in dem sybenden jar, an vnser frowen abend ze dem arnde.