Ich Rudolff Kilchmatter burger Zurich tun kund vnd vergich offenlich mit disem brief, als der edel min genediger herr graff Johans von Sanegans¹ mir schuldig was dru thusent guldin guter vnd gaber an gold vnd an gewicht, fur dieselben dru thusent guldin aber mir versprochen vnd gelobt hând ze geben die erbern Johans vnd Heinrich die Stoklin gebruder von Veltkilch², sol man wissen, daz der edel min genediger herr graff Donat von Toggenburg³ mir dem egenanten Kilchmatter an die vorgenanten dru thusent guldin bezalt vnd gewert hât achtzehenhundert guldin an gold, der selben achtzehenhundert guldin hat er mir bezalt dru hundert guldin an barem gelt vnd funfzehen hundert guldin ist er mir noch schuldig, als min brief wiset, den ich dar vmb besigelt innehan, vnd vmb die vorgeseiten achtzehenhundert guldin sag ich die egenanten Stoklin bed vnd ir erben fur mich vnd min erben nu vnd hienach ledig lôs vnd quit mit disem brief. Vnd des ze vrkund han ich min insigel gedrukt offenlich vff disen brief. Anno domini M^oCCC^oLXXXXVII^o.