Allen^a die disen brief sechend oder horent lesen, kund ich frôw Angnesa von Alstetten¹ vnd vergich offenlich mit disem brief, dz ich fur||
mich vnd all min erben mit guter williger wolbedachter vorbetrachtung ze den zitten vnd tagen, do ich das gesundes libs mit allem||
recht wol krefteklich getun môcht, vnd sunderlich mit willen wissend vnd hand Hansz Binggen mines elichen mans vnd rechten||
vogtz min aygen gut das hus die hofstatt vnd den garten da by, das alles gelegen ist ze Flums² im dorf, stost ainhalb an die strasz, die fur den frithof hingat, andrent an die strasz, die fur Griffenses³ turn hingat, ze der dritten sitten an die stras, die fur der Predier⁴ hus husgât, ze der vierden sitten an der Predier hus, mit grund mit grad mit stegen mit wegen mit tach mit gemach mit nagel mit nut mit gemur mit stok mit stain mit allen rêchten gewonhaiten vnd zu gehorden, so von alter oder von rechtz wegen darzu gehort oder gehoren mag, dem erbern knecht Dietrichen Pfufner sesshafft ze Flums vnd sinen erben recht vnd redlich aines rechten bestaten vngeuarlichen ewigen kôffs vnd ôch fur recht frig ledig vnuerkumbert aygen gut vnd von menglichem vnânsprachig aygenlich fur mich vnd min erben ze kôffen geben han vmb acht vnd viertzig phund haller, dero ich gar vnd gantzlich nach minem willen an barem gelt von im bezalt vnd gewert byn, damit ich ôch minen guten nutz geschafft han. Ich han ôch fur mich vnd min erben mit dem vorgenanten minem rechten vogt dz obgenant gut alles mit aller zu gehort dem egenanten Dietrichen oder sinen erben recht vnd redlich vfgeben vnd dz zu iren handen vnd gwalt geuertgot vnd bracht vnd disen ewigen kôf gen inen volfurt vnd getân, als dz yetz vnd hernach eweklich wol krafft vnd macht haben vest vnd stat beliben sol mit gantzer kreftiger vnd williger entzichnusz des abzûgs vnd aller aygenschafft aller lechenschafft aller pfandschafft aller gewaltsami aller recht vordrung vnd ansprach, so ich oder min erben ald yeman anders von vnser wegen yetz vnd hernach yemer darzu gewinnen gehaben oder vsgeziechen mochtint, vnd setz in vnd sin erben zu dem selben gut in recht still gut nutzlich gewer mit krafft disz briefs. Ich obgenante Angnêsa oder min erben, ob ich nut wer, sollent des obgenanten Dietrichen Pfufners oder siner erben, ob er nut wer, vmb dz obgenant gut vnd vmb disen ewigen kôff gut vnd getruw weren vnd geweren sin nach recht, wa wie oder gen wêm sy des yemer bedurfent ald noturftig werdent, an gaistlichen oder an weltlichen gerichten by guten truwen ân all geuerd vnd widerred. Vnd hervmb ze ainem waren offen vrkund vnd vester stater sicherhait aller vorgeschribner ding so han ich obgenante frôw Angnesa von Altstetten min insigel offenlich fur mich vnd min erben gehenkt an disen brief, vnd ich obgenanter Hans Bingg vergich offenlich an disem brief, dz diser ewig koff mit minem guten willen vnd gunst beschechen vnd volfurt ist. Des ze vrkund so han ich min insigel von der vogty wegen vnd ze ainer zugnus disz kôffs fur mich offenlich gehenkt an disen brief. Der geben ist an dem nechsten fritag vor sant Martis tag, do man zalt von Cristi geburt viertzehen hundert jar, darnach in dem dritten jare.