Ich^a Syfrid Kersberger vogt ze Frowenfeld¹ von gewalt vnd gnâden miner gnadiger herschaft von Osterrich tun kunt vnd||
vergich offenlich mit disem brief allen, die in ansehent oder horent lesen, das fur mich kament in Schonawegen² vssrentLhalb der statt gerihten ze sant Gallen in der obgenanten miner herschaft von Osterrich grafschaft, do ich offenlich ze geriht||
sass, der beschaiden kneht Wilhelm Liehtistaiger burger ze sant Gallen an ainem tail vnd Syman Hofer ze dem andern taile, vnd stalten sich da baidenthalb offenlich vor mir vnd dem geriht mit fursprechen, vnd klegt da der vorgenant Wilhelm Liehtistaiger mit sinem fursprechen offenlich vor^b vnd dem geriht zu dem obgenanten Syman Hofer, der fur ainen schadlichen man von dubstal wegen fur mich an offen geriht gebunden vnd gefangen gefurt vnd geantwurt ward, das der selb Syman Hofer, der ze gegen stund, im vnd dem lande ain schadlicher man war von dubstal wegen vnd das er ain samlich schadlicher man war, daz man von siner misstat wegen billich vber in rihten solt, vnd batt mich darumb gerihtes hin zu im, do batt im der obgenant Syman Hofer mit sinem fursprechen eruarn an ainer vrtail, sid daz im die klag an sinen lib giengi, ob man im danne iht billich des ersten enbinden solt, das ward im mit rehter vrtail ertailt vnd doch also, das man in von des gerihtes wegen in samlicher hut vnd gewarsami haben solt, das er dem geriht niht ab swaiff wurd vnd das dem vorgenanten kleger Wilhelm Liehtistaiger das reht von im wider fur, als er zu im klegt hett, vnd do er also nach rehter vrtail enbunden stund, do antwurt der selb Syman Hofer mit sinem fursprechen vnd sprach willeklich vnd vnbezwungenlich offenlich vor mir an geriht, alz der vorgenant Wilhelm Liehtistaiger zu im geklegt hett, des war er laider schuldig vnd hett den tod verschult vnd wolt darumb nieman lassen sagen noch sweren durch siner sel nutz vnd hailes willen, vnd nach der selben vergiht do batt mich der vorgenant Wilhelm Liehtistaiger mit sinem fursprechen eruarn an ainer vrtail, was nv reht war. Daz tet ich vnd ward ertailt mit gemainer vrtail, das ich von des gerihtes wegen den obgenanten Syman Hofer dem nachrihter beuelhen vnd antwurten solt vnd das im der sin hende hinder sich binden vnd sinu ogen verbinden solt vnd in dem ertrich entfromden vnd dem luft beuelhen vnd in an ainen galgen henken solt. Vnd do das beschach vnd ertailt ward, do batt mich der vorgenant Wilhelm Liehtistaiger mit sinem fursprechen eruarn an ainer vrtail, ob das war, das in oder ieman andre, die mit raten oder mit getaten hierzu geraten oder geholffen hettint, vechti oder beschalkoti von der klag vnd von des selben Syman Hofers vanknuss vnd todes wegen, was danne darumb reht war, das tet ich vnd ward nach miner frage ertailt mit gemainer vrtail, beschach das ieman, wer die warint ald wie su genant warint, den vorgenanten Wilhelm Liehtistaiger oder iemant andre, wer die warint, die mit raten oder mit getaten schuld hettint an des obgenanten Syman Hofers vanknuss vnd tode vnd darzu geraten oder geholffen hettin, vechtint oder schadgotint an iro lib oder an iro gut, wa man den oder die, die das tatint, an kami vnd ergriffi, daz die in den selben schulden stan vnd vertailt lut sin soltint in gelicher wise, alz der obgenant Syman Hofer stund vnd waz, do er dem nachrihter mit vrtail geantwurt vnd beuolhen ward. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so han ich Syfrid Kersberger vogt da vorgenant von des gerihtes wegen min aigen insigel mit gemainer vnd rehter vrtail offenlich gehenkt an disen brief. Der geben ist ze sant Gallen an dem nahsten donstag vor sant Hylarien tag nach wihennahten in dem jar, do man zalt von Cristus geburt vierzehenhundert jar vnd darnach in dem funften jare.