Dem^a edeln wolgebornen herren Eglolfen von Wartenberg genant von Wildenstain¹||
frygen hofrihter ze Rotwil² an stat vnd in namen des edeln graf Rudolf von||
Sultz³ von vnsers gnadigen herren des Romschen kung Ruprehtz gewalt enbieten||
wir der burgermaister der rat vnd die burger gemainlich der statt ze sant Gallen vnser willig dienst in allen sachen. Uwer erwirdi tunt wir ze wissenn, das wir vmb die klag vnd zuspruch, alz der erwirdig herre her Albreht Blârrer tunprobst ze Costentz⁴ vnd sin klag furer vns zusprechent nach des brieues sag, alz vns die klag von uch verkunt ist, den erbern Vlrichen Spiesser vnd Rudolf Wulliweber vnsern ratgesellen zoger dis briefs vollen vnd gantzen gewalt geben haben vnd geben in baiden vnd ir ietwedrem besunder mit disem brief, vns gemainlich vnd sunderlich vor uch vnd dem hofgeriht ze versprechenn vnd ze verstanne gegen des obgenanten her Albreht Blarers tunprobst ze Costentz vnd sines klag furers klag vnd gegen andern, die vns gemainlich ald sunderlich zu sprechent, vnd och mit namen vmb die klag vnd zuspruch, als die selben vnser gewissen botten an vnser statt vor uch vnd dem hofgeriht offnont vnd furbringent, vff gewin vnd vff verlust, vnd wie sie die selben sachen werbent zu dem rehten vnd in vrtail git. Das ist vnser wille vnd gunst, alz ob wir selber ze gegen warint, won si hierumb vnser gewissen botten sint. Vrkund dis briefs geben vnd versigelt mit vnser statt angehenktem insigel an dem nahsten samstag nach dem zwelften tag nach wihennaht in dem jar, do man zalt von Cristus geburt vierzehenhundert jar vnd darnach in dem funften jare.