Ich^a Eglolff von Wartemberg genant von Wildenstain¹ ain fry hofrihter ze Rotwil² an stat vnd in namen des edeln graue Rudolfs von Sultz³ von des aller durchluhtigosten hochgebornen fursten vnd herren hern Ruprehtz||
Romschen kunigs mins gnedigen herren gewalt an siner stat vf sinem hofe ze Rotwil vergich offenlich vnd tun kunt mit disem brief allen den, die in ansehent lesent oder horent lesen, daz ich ze gerihte||
sas vf dem hofe ze Rotwil an der offnen frigen kunges strasse vf disen tag, als dirre brief geben ist, vnd stund vor mir vf demselben hofe der fromen wisen des burgermaisters des ratz vnd der burger||
gemainlich der stat ze sant Gallen erberu vnd gewissi botschaft mit namen Vlrich Spiesser vnd Rudolff Wulliweber mit vollem gewalt an ir aller stat vnd zeugt da des ersten ainen guten gantzen gerehten redlichen vnd vngebresthaften frighaitbrief mit des aller durchluhtigosten hochgebornen fursten vnd herren hern Wentzelaws vor zijten Romschen kunigs mins gnedigen herren anhangendem maiestat insigel versigelt vnd zeugt do daruf ainen bestatgungbrief von dem aller durchluhtigosten hochgebornen fursten vnd herren hern Ruprehtz ietzo Romschen kunigs ouch mins gnedigen herren anhangendem maiestat insigel versigelt, der selb frighaitbrief vnd ouch der bestatgungbrief beid vor mir in offem geriht des hofs ze Rotwil gelesen vnd verhort wurden vnd von wort ze wort stunden, als hienach geschriben stat: Es folgt der Text von Nr. 5655. So ist dis der bestatgung brief: Es folgt der Text von Nr.7204 Vnd do der ietzgeschriben frighaitbrief vnd ouch der bestatgungbrief daruf beid also vor mir in offem geriht des hofs ze Rotwil gelesen vnd verhort wurden, do battend mich der egenanten von sant Gallen erbern botten an ir stat an ainer vrtail ze erfarend, ob man in der obgenanten gnaden vnd frighaiten vnd ouch der bestatgung ut billich vidimus geben solt mit des hofgerihtz ze Rotwil insigel besigelt. Darumb vorschet ich der vrtail vnd wart nach miner frag ertailt mit rehtem gerihte vnd mit gesamnoter vrtail, als vf dem hofe ze Rotwil reht waz, daz man den egenanten von sant Gallen der obgenanten gnad vnd frighait vnd ouch der bestatgung billich vidimus geben solt mit des hofgerihtz ze Rotwil insigel besigelt. Vnd herumb ze offem vrkund han ich des hofs ze Rotwil insigel mit vrtail offenlich gehenckt an disen brief. Der geben ist an dem nehsten dunrstag nach sant Hylarien tag des jares, do man zalt nach geburt Cristi viertzehenhundert jare vnd darnach in dem funften jare.