Wir Fridr.1 etc. bekennen vnd tun kunt fur die hoch(geboreⁿ fursten vnser lieben pruder vns vnd vnser erben vmb die tausent phunt haller, so wir vnsern lieben getrewen dem rate vnd den burgern vnser stat zu Raprechtswiler² noch schuldig beliben bey den zwain tausent vnd sechshundert gulden si weilent fur den hoch(geboreⁿ fursten herzog Leupolten³ vnsern vatter sêligen gestanden warend vnd der wir sy vntz an die obgenanten tausent phund bezalt vnd abgetragen haben, daz wir sy nu vmb dieselben tausent phunt geweiset habent vnd weisen auch wissentlich mit dem gegenburtigen brief auf die nutz vnser herschaft zu Sangans⁴ mit solichem gedinge, daz in dauon an denselben tausent phunden hinfur jêrlich auf sant Gallen tag geuallen vnd furderlich wideruarn sullen zwai hundert pfunt haller an zeheben mit der ersten bezallung auf den schiristkunftigen sant Gallen tag so lange, vntz daz sy vmb die obgenant summ der tausent phunt haller gentzlich sein ausgericht. Darnach sullent vns die vorgenanten vnser nutz von in ledig vnd los sein. War aber, das sy dhaines jars von den vorgenanten vnsern nutzen also vmb zwai hundert phunt haller nicht mochten gentzlich ausgericht werden, was in den daran abgieng, das sullen wir in aus vnsrer kamer furderlich derstatten vnd ausrichten. Dauon emphelhen wir vnserm getrewn Hannsen von Wartaw⁵ vnserm amptmann zu Sangans oder wer ye zu den zeiten vnser amptman daselbs ist, daz er die vorgenanten von Raprechtswiler also yegleichs kunftigen jares an solicher irer geltschulde vmb zwai hundert phunt haller auf sant Gallen tag furderlich vnd gentzlich ausricht vnd anheb mit der ersten bezallung auf sant Gallen tag ditz gegenburtigen jars schiristkunftigen, wan wenn er das getan hat, so wellen vnd sullen wir im die yeglichs jars an seiner raytung legen vnd abziehen. Mit vrk(un^d. Geben zu Schafhusen⁶ an pfintztag nach Hylarii anno etc. CCCCoVo.