Allen^a den, die disen brief sehent oder horent lesen, kund vnd vergih ich Vrsula Dietzin von Roschach¹ Clausen von||
Burron² wilunt ze sant Gallen elichi wirtine, das mich die wisen fursihtigen min gnadigen herren der burgermaister||
vnd der rât der statt ze sant Gallen von schuld vnd sach wegen, vmb die si mich inzigen hielten gefangen vnd geturnet||
hatten vnd in iro banden lag, vnd in den ziten min gnadigen junkherren die von Roschach vnd ander erber lute vil man vnd frowen durch got vnd von miner frunden flissiger bett wegen ir ernstlich bett als furderlicher vnd trulich laiten an die obgenamten min herren von sant Gallen, das si mich vss iro vanknust vnd banden ledig gelassen hand. Vnd herumb so han ich willenklich vnd vnbezwungenlich gesworen ainen gelerten aid zu got vnd zu den hailigen mit vfgebottnen vingern, das ich getrulich halten tun vnd laisten sol nv vnd hernach, als diser brief wîset vnd seit. Ich sol inwendig den nahsten kunftigen aht tagen nach datum diss briefs ân alle widerred vnd vszug keren vnd komen vber Rîn³ von der statte sant Gallen vnd sol niemer me in dehain wîs noch weg haimlich noch offenlich her widervmb vber Rin wandlen noch komen. Ich sol och vmb die gefanknuss vnd sach alle min frund ze frunde gewinnen allen vnd ieklichen ietzigen vnd kunftigen burgern vnd burgerinen der statte ze sant Gallen vnd die sach niemer ze aferen noch schaffen ald vergunsten geafert von reht noch von gwonhait, won ich gantz vrfehi in den aid genomen vnd gesworen han. Was oder welherlay ansprach ald zuspruch och ich ietz hab ald haben moht ald hienach iemer gehaben ald gewinnen moht zu dehainen ietzigen ald kunftigen burgern ald burgerinen der statte ze sant Gallen gemainlich ald sunderlich oder zu gemainer statte ze sant Gallen, es sig von geltschuld ald von dehainerlay andren sachen, die sigint minder oder mêr, vmb die sol ich si nienahin triben noch ieman von minen wegen weder mit gaistlichen noch mit weltlichen gerihten noch ân geriht, sunder ich sol das reht darumb des ersten ze sant Gallen vor der statte ehaftem amman nemen vnd halten vnd dem da gnug tun. Ich oder min gewisse furwesen vnd botten werden danne vmb dieselben sachen daselbs rehtlos gelâssen vnd werd das kuntlich mit demselben gerihte, so mag ich das reht vmb dieselben sach, vmb die ich rehtlos gelassen bin, oder min botten anderswa suchen vnd doch nit anders won nach rehte. Vnd vmb das ich min er vnd minen aid vnd alles das, so an disem brief geschriben stât, dester furderlicher halt vnd och gehalten werd nv vnd hernach, so han ich allen vnd ieklichen ietzigen vnd kunftigen burgermaistern raten burgern vnd burgerinen der statte ze sant Gallen herumb zu mir ze merer vnd ze besser sicherhait ze burgen gegeben vnd gesetzt dis nachgenamten erberen lute alle mit namen Cuntzen Dietzin, Rudin Dietzin vnd Dietzin Dietzin alle drig min elich bruder vnd min lieben frund Hannin vnd Cuntzen die Berschis gebruder, Cuntzen im Hof, Rudin vnd Hansen die Spaten, Vlin Dietzin, Cuntzlin Vitler vnd Hannin Pfund, Hainin Schmid von Roschach vnd Hainin Rennhasen von Goldah⁴, die dis burgschafft alle drigzehen gemainlich vnd vnuerschaidenlich uff sich genomen vnd gelobt hand mit iro truwen an aides statt, wari das ich nit hielt vnd dem gnug tat, das an disem brief geschriben stât, vnd an dem allem ald an dehainem besunder uberfur ald ieman von minen wegen nv ald hernach haimlich ald offenlich, das got wend, ie danne ze stund von des vberfarentz wegen sond die egenamten burgen alle vnd ir iekliche besunder gemainlich vnd vnuerschaidenlich dem burgermaister vnd rate der statte ze sant Gallen, die danne sind, verfallen sin vnd och aigentlichen vnd furderlich, es werd geaischet oder nit, inwendig den nahsten aht tagen nach der verkundung des vberfarens bezalen ze sant Gallen in der statt âne widerred vnd vszug hundert pfund pfenning ie danne guter genger Costenzer munsse, vnd mugen och die burgermaister vnd rate der egenamten statte, welh die danne sind, vnd iro helffer, wer die sind, die egenamten burgen alle gemainlich vnd welhe si wellent besunder darumb angriffen noten vnd schadgen an iro ligenden vnd varenden guter vnd die verkoffen mit gaistlichen vnd mit weltlichen gerihten vnd ân geriht bis an volbzalung der egenamten hundert pfund pfenning vnd alles schadens, in den si ienannt da von koment, vnd sol si da vor nit schirmen gaistlich noch weltlich geriht noch vt anders. Des alles ze warem vrkund hat der wîs wolbeschaiden Johans der Entziswiller vogte vnd burger ze sant Gallen⁵ disen brief von miner bett wegen fur mich versigelt im selb vnd sinen erben vnschadlich. Wir egenamten drizehen burgen veriehen ain warhait dirre burgschafft vnd alles des, so an disem brief geschriben stât, den von vnser aller flissiger bette wegen versigelt hand fur vns der vest wolbeschaiden junkherr Egli von Roschach⁶ der eltest vnser gnadiger junkherr im selb vnd sinen erben in andren sachen vnschadlich, vnd der wîs wolbeschaiden Johans Amman von Roschach der elter im selb vnd sinen erben gantzlich vnschadlich. Geben ze Roschach am nahsten samstag na sant Agten tag im jar, do man zalt von Crists geburt tusent vierhundert vnd ffunf jare.