Innocencius etc. Dilecto filio preposito ecclesie Spirensis¹ salutem etc. Vite ac morum honestas aliaque laudabilia probitatis et virtutum merita, super quibus apud nos dilectus filius Martinus Wurtwin clericus Wormaciensis² diocesis fidedigno commendatur testimonio, nos inducunt, ut sibi reddamur ad graciam liberales. Cum itaque, sicud accepimus, dilectus filius Vlricus de Albeck³ rector parrochialis ecclesie in Jonswile⁴ Constanciensis diocesis eandem ecclesiam, quam obtinet, ex certis racionabilibus causis sponte et libere resignare proponat, nos votis eiusdem Vlrici in hac parte favorabiliter annuentes ac volentes eidem Martino premissorum meritorum suorum intuitu graciam facere specialem, discretioni tue per apostolica scripta committimus et mandamus, quatinus ab eodem Vlrico vel procuratore suo ad hoc specialiter constituto resignacionem huiusmodi, si eam sponte et libere facere voluerit, auctoritate nostra hac vice dumtaxat recipias et admittas et huiusmodi resignacione sic per te recepta et admissa parrochialem ecclesiam predictam, cuius fructus redditus et proventus duodecim marcharum argenti puri secundum communem extimacionem valorem annuum, ut idem Martinus asserit, non excedunt, cum per huiusmodi resignacionem vacabit, eciam si super ea inter aliquos lis in Romana curia vel extra eam remanserit indecisa, cum omnibus iuribus et pertinenciis suis eidem Martino auctoritate predicta conferas et assignes, inducens per te vel alium seu alios eundem Martinum vel procuratorem suum eius nomine in corporalem possessionem ecclesie iuriumque et pertinenciarum predictorum eadem auctoritate et defendens inductum amoto exinde quolibet detentore sibique faciens de ipsius ecclesie fructibus redditibus proventibus iuribus et obvencionibus universis integre responderi, contradictores auctoritate nostra etc., non obstantibus tam pie memorie Bonifacii pape VIII predecessoris nostri quam aliis constitucionibus apostolicis contrariis quibuscumque aut si aliqui super provisionibus sibi faciendis de huiusmodi vel aliis beneficiis ecclesiasticis in illis partibus speciales vel generales apostolice sedis vel legatorum eius litteras impetrarint, eciam si per eas ad inhibicionem reservacionem et decretum vel alias quomodolibet sit processum, quibus omnibus dictum Martinum in assecucuione dicte ecclesie volumus anteferri, sed nullum per hoc eis quoad assecucionem beneficiorum aliorum preiudicium generari, seu si venerabili fratri nostro episcopo Constanciensi vel quibusvis aliis communiter vel divisim ab eadem sit sede indultum, quod ad recepcionem vel provisionem alicuius minime teneantur et ad id compelli aut quod interdici suspendi vel excommunicari non possint, quodque de huiusmodi vel aliis beneficiis ecclesiasticis ad eorum collacionem provisionem presentacionem seu quamvis aliam disposicionem coniunctim vel separatim spectantibus nulli valeat provideri per litteras apostolicas non facientes plenam et expressam ac de verbo ad verbum de indulto huiusmodi mencionem, et qualibet alia dicte sedis indulgencia generali vel speciali, cuiuscumque tenoris existat, per quam presentibus non expressam vel totaliter non insertam effectus huiusmodi gracie impediri valeat quomodolibet vel differri et de qua cuiusque toto tenore habenda sit in nostris litteris mencio specialis ceterum eum cum non sit verisimile, quod quis beneficia sua forsan magnis laboribus acquisita, de quibus vice subsidium percipit, sine magna causa sponte resignet attencius provideas, quod in huiusmodi resignacionem, si fiat ex parte Vlrici et Martini predictorum nulla symoniaca pravitas intervenerit seu eciam corruptela, nos enim exnunc irritum decernimus et inane, si secus super hiis et quoquam quavis auctoritate scienter vel ignoranter contigerit attemptari. Dat. Rome apud sanctum Petrum undecimo kl. marcii anno primo. A.XXVI. Aldimarius.