Wir^a der burgermaister rate vnd zunftmaister vnd alle burger gemainlich rich vnd arme der stat ze Costentz bekennen vns offenlich an disem gegenwurtigen brief, als wir||
vns mit guten fursatzen vnd mit wolbedauchtem mute fur vns vnd vnser nachkomen zu den durluhtigen hochgebornen fursten vnsren gnedigen herren hertzog Livtpolten vnd hertzog||
Frydrichen gebrudern hertzogen ze Osterrich ze Stir ze Kernden vnd ze Krain grauffen ze Tyrol etc. vnd zu iren landen Turgow Ergow Swauben vnd Kurwalhen vnd zu allen den||
iren in den selben kraissen vnd landen gesezzen veraint vnd verbunden haben hinnanthin vntz vff sant Georyen tag nechstkunfftigen vnd darnach funf gantze jare div nechsten nach ainander nach des puntbriefs lut vnd sag, den wir in daruber besigelt vnd gegeben haben, vnd wan wir in dem selben bund vnd bundbrief vzgenomen vnd vsgesetzt haben den aller durluhtigsten fursten vnsern gnedigsten herren hern Ruprechten von gottes gnaden Romischen kunig zu allen ziten merrer des richs, noch denne so haben wir ainmuteklich der selben vnser herrschafft von Osterrich versprochen vnd verhaizzen, wer es das der egenant vnser herre der Romisch kunig oder iemant von sinen wegen inzit diser verainung mit der obgenanten vnser herrschafft von Osterrich ze schaffen gewunne oder haben wolte, es were das er si triben oder drengen wolt von frihaiten rechten oder guten gewonhaiten oder suss in ander wege, das wir denne demselben vnserm herren dem kunig wider si nit sullen beholffen sin in dehainerlai wise ane geuerde, sunder sullen wir vnd alle die vnsern darunder gentzlichen still sitzen ane allen argenlist. Ouch sol in darunder vss vnsren stetten kost zugan vnd si daran nit hinderen noch si vnd die iren in kain ander weg die obgenanten zit gar vz nit vssern noch schuhen von dehainerlai stuk oder sach wegen ane alle geuerde. Als wir denne in dem selben vorgenanten bund vnd bundbrief aber vsgenomen vnd vsgesetzt haben vnser aidgenozzen die stett, die den bund mit vns haltent vmb den Se vnd ym Albgowe, daz sol ouch also bestan vnd sullen die gen der obgenanten vnser herrschafft von Osterrich vzgesetzt sin, die zit vnd wil der selb vnser bund gen in werot, das ist vntz vff sant Georyen tag ze nechst vnd darnach ain gantz iar das nechst. Wenn das vzkompt, so sol es darnach also bestan, die wil vnd disiv ainung gen der obgenanten vnser herrschafft von Osterrich werot, als vorgeschriben stat, also wer es, das div selb vnser herrschafft von Osterrich dazwischan mit den selben stetten, die ietzo vnsers punds sint, oder die selben stett mit im icht ze schaffen gewunnen, wie oder in welen weg sich das gefugte ane geuerde, so sullen wir darunder vf baiden tailn gentzlich still ligen vnd entwederm tail wider den andern hilfflich sin ane geuerde. Kvnnen wir aber vt gutz darunder vnd zu iren sachen gereden, das mugen wir wol tun vngeuarlichen. Vnd dirre ding aller ze vrkund der warhait vnd stater sicherhait so haben wir obgenanten der burgermaister rate vnd zunftmaister vnd die burger gemainlich der stat ze Costentz vnser stat gros ynsigel offenlich gehenkt an disen brieff. Der geben ist in dem iar, do man zalt nach Cristi geburt vierzehenhundert jare vnd darnach in dem funften iar an fritag vor dem sunnentag Invocavit in der vasten.