Wir^a Fridreich von gots gnaden herczog ze Osterr(eic^h ze Steyr ze Kernden vnd ze Krain graf ze Tyrol¹ etc. bekennen vnd tun kunt||
offenleich mit disem brief, als die erbern weisen vnser lieben besundern .. der purgermaister der rat vnd die purger gemainleich||
der statt ze Costencz fur sich ir helfer vnd dyener vnd fur alle die irn, die zu in gehaft vnd gewandt sind, ain seyt vnd vnser||
lieber getrewr Hainreich von Gachnang² genandt Munich fur sich, Chunraten von Gachnang seinen pruder vnd Jorgen von Ennd³ ir helfer vnd dyener vnd fur alle die irn, die zu in gehaft vnd gewandt sind, auf die andern seyt, ir krieg vnd stoss, so si bis auf dis zeit mit einander gehebt habend, an vns gelassen habent, wie wir si darumb richten vnd entschaiden oder darumb aussprechen, daz si dabey beleiben vnd das stett haben sullent ane all geuer vnd arge list. Auf das haben wir si nach rate vnserr reten darumb freuntleich mit einander gericht vnd entschaiden vnd sprechen darumb also auss. Des ersten daz dieselben ir krieg stoss vnd zwayung vnd was dauon aufgestanden vnd aufgelaufen ist entzwischen in baider seyt vnd allen den iren genczleich gericht vnd gesunt sullent sein vnd von entwederm tail nymmer mer geefert gemeldet oder gerochen werden haimleich noch offenleich in kain weg. Auch was geuangen da sind, die sullent zu baider seyt auf ain slecht vrfech ane kostgelt ledig sein an geuerde. Was auch prantschaczung oder ander schaczung noch vorhannden vnd vnbezalt sind, si sein verbrieft verpurget oder nicht, besunder die sibenczig vnd drew hundert guldein, die Herman Maisterli von Costencz dem obgenanten Hainreichen von Gachnang verpurget hat, vnd fumf vnd vierczig guldein, die im der gepur, der Chunraten von Hof von Costencz zugehort, auch verpurget hat, das sol mit einander absein vnd weder si noch ir purgen darumb nymmer mer bekumbert noch angelangt werden in kain weg. Denn von der andern zugriff wegen, so der egenant Hainreich Munich vnd die sein darunder hincz den egenanten von Costencz getan hat, das behalten wir furbas hin zu vnserm spruch, den wir darumb tun sullen, was er den egenanten von Costencz darumb tu, des sol er gehorsam sein. Geben ze Schafhusen⁴ an dem suntag Invocavit in der vasten nach Christs gepurd in dem vierczehenhundertisten vnd dem fumften jare.