Ich^a Herman von der Breiten Landenberg vogt ze Rapreswile¹ vergich vnd tun kunt mit disem brieff vmb die zuspruch, so der erwirLdig herr abt Gotfrit des gotzhus ze Ruti² gehept hat zu der erbern frowen Margareten Gusinen wilent Hansen Zurichers||
burgers ze Wil³ elichu husfrow vmb die vngehorsami vnd vngenossami, das si zu einem elichen man genomen hat den bescheiLden Classen Grassen, der selben stosz vnd zuspruch si ze beiden siten uff mich den obgenanten Herman vogt ze Rapreswile komen sind vnd verheissen, wâr vnd stat ze halten, was ich dar vmb sprêch. Vnd also sprich ich ôch des ersten, das alle die stosz vnd zuspruch, so der ietzgenant min herr von Ruti zu den selben Margareten Gusinen vnd Classen Grassen irem man bis uff disen huttigen tag, als dirr brieff geben ist, gehept hat, tod vnd ab vnd gentzlich vernicht vnd hinnenhin sol er ir gnadiger herr vnd gut frund sin. Dar zu sprich ich och, das die obgenant frow Margareta Gussin vnd Clasz Grass ir elicher man dem vorgenanten minem herren dem abt oder sinen nâchkomen, ob er ewâr, ze busz richten vnd geben sullen sechs guter vnd gengger alter guldin vff den nachsten sant Martis tag nach datum dietz brieffs schierost kunfftig oder aht tag dar nâch an geuerde vnd uff den nachsten meyen tag nach dem ietzgenanten sant Martis tag schierost kunfftig och sechs guter alter guldin ân guerde. Aber sprich ich, das die egeseit frow Margareta des vorgeschriben Grassen elichu husfrow hinnenhin allu jar, die wil si lebt, ie uff sant Martis tag dem dikgenanten abt Gotfrit ze Ruti oder sinen nachkomen, ob er enwâr, richten vnd geben sol einen guten alten guldin an furzug ze einem zins vnd sol da mit dem dikgenanten abt Gotfrit vnd sinem gotzhus nutzit ab getadinget sin, war zu er oder sin gotzhus zu ir lib vnd ir gut hinnenhin oder nach ir tod von erbes vnd von valles wegen rechtes gehaben mocht, an geuerde. Vnd des zu einem waren vnd vesten vrkund aller vorgeschribner dingen so han ich von der obgenanten beider teil ernschlicher bett wegen min eigen insigel offenlich gehenkt an disen brieff. Der geben ist in der statt ze Rapreswile an dem viertzehenden tag abrellen, als man zalt von Cristi geburt viertzehen hundert vnd funff jar.