Vnser früntlich willig dienst ste vor. Wüssent lieben frunt, dz vnser herr von Osterrich vnd die von Costenz vff den vergangnen cinstag vff vns gezogen sint wol mit sechs tusent mannen oder me. Die haben wir lassen ziehen durch vnser letzinen in. Vnd also hant si sich geslagen zu vnser stat vff den berg vnd hant vns da gewust vnd gebrent, was si da funden ald das si vns getun mochten. Da haben wir mit in gescharmutzt vnd haben in an dem scharmutzen wol XV man erschossen vnd erschlagen. Vnd als si vff die mitwochen fru enweg wolten ziehen, do branten si vns vff dem berg, was wir dannocht da hatten, vnd triben die von Rotwil¹ an vns, dz wir irem burgermaister vnd noch ainem gelait in vnser stat gebin. Das taten wir, aber si kamen nit zu vns vnd branten ir hutten vnd brachen vff vnd zugen von vns. Vnd als si von vns zugen, do ilten wir inen nach vntz an vnser letzi vnd griffent si an vnd habin XXXVI erstochen, die vff der waltstatt ligent. Dennocht hant si etwa vil enweg gefurt, da wissent wir nit, wie vil dero ist. Also hat es got aigenlich mit vns gehebt vnd vns sin hilff geboten. Wir haben och den von Schaffhusen² ir paner entwert vnd an gewunnen. Wissend och lieben frunt, dz och vff die selben mitwochen wol vier tusent man vss dem Rintal an den Stoss³ gegen Appentzell⁴ gezogen sint. Also hant die von Appenzell wol tusent man lassen ziehen in ir letzi vnd hant si da angriffen vnd vil erschlagen, dz si ietzo hant ob IIJ-c pantzern an der butung vnd findent all tag me, so sint ir vil ertrunken. Da tunt so wol lieben frund vnd verkundent das den von Zürich vnd andren, won wir nit weg haben mugen. Lieben guten frunt, wir bitten vch gar ernschlich, ob ir vt horint, davon vns schad zu mocht komen, dz ir vns das bi tag vnd bi nacht verkundint vff vnsern kosten durch vnsers ewigen dienstz willen, als wir vch des sunderlich wol getruwen. Geben an dem nechsten fritag nach vnsers herren fronlichams tag anno millesimo CCCCo quinto.