Wir^a die hoflut vnd die burger alle gemainlich arm vnd rich der statt ze Altstetten¹ vnd wir die hoflut alle gemainlich ze Bernang² vnd ze Martpach³||
gelegen in dem Rintal tun kunt vnd veriehent offenlich fur vns fur alle vnser erben vnd nachkomen mit disem brief allen, die in sehent oder horent lesen,||
alz manglichem offen vnd ze wissenn ist von solicher grossen gebresten vnd schaden, so vns von herschaft vnd von andern luten taglich beschiht anLgeraicht vnd beschadgot werdent wider rehtz, hierumb so haben wir vns ainhelleklich mit wolbedahtem mut geaint verstrikt vnd verbunden vns ze frid vnd ze gemach ainen vnd verbinden vns mit vrkund vnd kraft dis gegenwurtigen brieues mit den vnd zu den ersamen wisen dem burgermaister dem rat vnd den burgern gemainlich der statt ze sant Gallen mit den vnd zu den ersamen dem amman vnd den lantluten gemainlich ze Appacelle⁴ von disem huttigen tag hin, alz dirre brief ist geben, die nahsten zehen gantzi jâr nach ain ander vnd dannenhin iemer me eweklich, won och das wâr ist, das wir von alter zu inen vnd zu dem gotzhus ze sant Gallen gehorent vnd gehoren sont. Wir habent vns och zu in verstrikt vnd verbunden vnd habent och bi guten truwen gelobt vnd verhaissen, das wir vnd vnser erben vnd nachkomen vnd alle, die zu vns gehorent vnd gehaft sint ald hie nach zu vns gehoren werdent, den obgenanten dem burgermaister dem rat vnd den burgern gemainlich der statt ze sant Gallen dem amman vnd den lantluten gemainlich ze Appacelle truw vnd warhait ir nutz ze furderrenn iro schaden ze wendenn, so verre wir mugen, ân alle geuarde vnd inen gehorsam ze sinne in allen sachen nut vsgenomen ân alle widerrede vnd ân alle geuarde, mit solichem gedinge vnd in den rehten, das si vns her wider vmb schirmen schutzen vnd halten sont wider alle, die vns wider rehtz angriffent ald beschadgent an vnserm lib oder an vnserm gut, wenne si des von vns ermant werdent, vnd vns och beraten vnd beholffen sien, alz in erlich vns vnd den vnsern trostlich sie, ze gelicher wis alz die obgenant statt iro burgern vnd die obgenanten lantlut iren lantluten, ân alle geuarde. Wir haben och alle gemainlich vnd ieklicher vnder vns besunder willeklich gesworn ainen gelerten aide liplich zu got vnd zu den hailigen mit vf gehabenen vingern, allu vorgeschribenen stuk vnd artikel wâr vnd stat ze haltenn ze tunne ze laistenn vnd ze vollefurenn ân alle widerred vnd ân alle geuarde. Vnd des alles ze offem warem vrkunde vnd stater sicherhait aller der vorgeschribenen dinge vnd vergiht so haben wir die obgenanten burger gemainlich der statt ze Altstetten fur vns vnser erben vnd nachkomen vnser statt gemain insigel offenlich gehenkt an disen brief. Vnd won wir die obgenanten hoflut ze Bernang vnd ze Martpach aigener insigel niht^b haben, so haben wir vns willeklich gebunden vnder der obgenanten dero von Altstetten insigel, wâr vnd stat ze haltenn vnd ze tunne alles, daz von vns da vorgeschriben stat an disem brief. Der geben ist ze Altstetten an sant Johans tag des Toffers ze sunnwendi in dem jar, do man zalt von Cristus geburt vierzehenhundert jâr vnd darnach in dem funften jare.