Ich^a Rudolf der Maiger von Altstetten¹ vergich offenlich mit disem brief vnd tun kunt allen, die in ansehent oder||
horent lesen, als ich der fursichtigen wisen der stette gemainlich des bunds vmb den Se vnd im Albgow||
mit andren weren rechter were worden bin vmb die zway tusend guter alter Rinischer guldin, so in der from||
vnd veste herr Marquart von Emptz ritter schuldig ist vnd gelten sol, als das der hoptbrief, so si von vns darumb besigelt inne hand, aigenlicher wol wiset vnd seit, vnd als ettlicher insigel, die in dem egenanten hoptbrief verschriben sind, daran nit komen sind, mit namen herr Marquartz von Schellenberg ritters, Albrechtz von Landenberg vnd Rudolfs von Landenberg, die dz verrett vnd versworen hand, vnd Rudolfs von Rosenbergs von Bernang, der laider nuwlich vor vnd e im der obgenant hoptbrief geantwurt wurde tode vnd erschlagen ist, daz iro insigel daran nit komen mag, bekenn ich fur mich vnd fur min erben mit disem brieff, das das den obgenanten stetten an der obgenanten sum schuld vnd gulte noch an dem obgenanten houptbrieff, den si darumb von mir vnd von andren weren besigelt hand, gen mir noch gen minen erben dehainen schaden bringen sol, vnd sol der obgenant hoptbrief darumb nutz dester vnkreftig sin in kainen wegen, wan das er allwege als kreftig nutz vnd gut haissen vnd sin sol zu aller notdurfft an allen stetten vnd gerichten, als ob du insigel daran komen vnd gehenkt werint. Vnd verzich mich och vnd min erben darumb dafur vnd dawider alles rechten aller funde vszuge vnd gefarden, das ich vnd min erben den egenanten stetten vmb die obgenanten zway tusend guldin vnd dem obgenanten irem hoptbrief gelich als gnug tun sullen vnd wellen an allen stuken vnd artikeln, so daran verschriben stat vnd als ob er gantz versigelt weri, bi dem aide, so ich darumb gesworn han nach des selben irs houptbriefs sage. Vnd des ze vrkunde der warhait so han ich min aigen insigel fur mich vnd fur min erben offenlich gehenket an disen brief. Der geben ist am nechsten mentag nach sant Vlrichs tag nach Cristus geburt viertzenhundert jar, darnach in dem funfften jar.