Ich^a Walther von Hohenfels¹ ritter, den man nempt herr Rumelli, vergich of¬fenlich vnd tun kunt mit disem brieff allen, die||
in ansehent oder horent lesen, als ich der fursichtigen vnd wisen der ainliff stette gemainlich des bunds vmb den||
Se² vnd im Allgow³ mit andren weren rechter were worden bin vmb die zway tusend guter alter Rinischer guldin,||
so in der from vnd veste herr Marquart von Emptz⁴ ritter schuldig ist vnd gelten sol, als das der hoptbrieff, so si von vns besigelt inne habend, aigenlicher wol wiset vnd seit, vnd als ettlicher insigel, die in dem egenanten hoptbrieff verschriben sind, daran nit komen sint, mit namen herr Marquartz von Schellenberg⁵ ritters, Albrechtz von Landenberg vnd Rudolffs von Landenberg⁶, die das verrett vnd versworn hand, vnd Rudolffs von Rosenbergs von Bernang⁷, der laider nuwlichs vor vnd e im der obgenant brieff geant¬wurt wurde tode vnd erschlagen ist, das sin insigel daran nit komen mag, bekenn ich fur mich vnd fur min erben mit disem brieff, das das den egenanten stetten an der egenanten summ schuld vnd gulte noch an dem obgenanten irem houptbrieff, den si darumb von mir vnd von andren weren besigelt hand, gen mir noch gen minen erben dehainen schaden bringen sol, vnd ensol och der egenant hoptbrief darumb nutzit dester vnkreftiger sin in kainen weg, wan das er allweg als kreftig nutzz vnd gute sin sol zu aller notdurfft an allen stetten vnd gerichten, als ob du insigel ellu daran komen vnd gehenkt werint, vnd verzich mich vnd min erben darumb dafur vnd dawider alles rechten aller funde vszuge vnd gefarden, vnd das ich vnd min erben den egenanten stetten vmb die obgenanten zway tusend guldin vnd dem obgenanten hoptbrieff gelich als gnug tun sullen vnd wellen an allen stuken vnd artikeln, so daran verschriben stat, als ob er gantz versigelt weri, bi dem aide, so ich darumb gesworen han nach des selben irs hoptbriefs lut vnd sage. Des ze vrkunde der warhait so han ich min aigen insigel fur mich vnd fur min erben offenlich gehenket an disen brieff. Der geben ist am nechsten mentag nach sant Vlrichs tag nach Cristy geburte vierczenhundert jar, darnach in dem funfften jar.