Wir^a der rat vnd die burger gemainlich der statt ze Liehtistaig¹ vnd allu die lender telrr vnd gegninen, die vnderthalb Liehtistaig gelegen sint vntz||
gen Lutispurg² vnd der herschaft von Toggenburg zu gehorent, wir der rat vnd die burger gemainlich der statt ze Vtzna³ vnd alle die lender telrr||
vnd gegninen, die vnder dem Wallensêw⁴ ob der statt Vtzna vnd vnder^b statt ze Vtzna gelegen vnd gesessen sint vnd der obgenanten herschaft||
zu gehorent, vnd wir die lantlut lender telrr vnd gegninen mit namen sant Johanner tal⁵, das Turtal⁶ vnd allu andru lender vnd gegninen von der Zapfoten Muli⁷ her ab vntz gen Liehtistaig, wie die genant oder gehaissen sint, es sien man oder frowen, die vff disen huttigen tag, alz dirre brief ist geben, in den obgenanten stetten lendern vnd gegninen wonhaft vnd gesessen sint, in welhi wise die der obgenanten herschaft zu gehorent, tun kunt aller manglichem mit disem offenn gegenwurtigen brief, daz wir durch nutz gutz frides ruw vnd gemaches willen vnser vnd gemaines landes vns mit wolbedahtem mut mit ainberem willen richer vnd armer lieplich vnd gutlich verpfliht verstrikt vnd verainbert haben verbinden vnd verainen vns mit kraft diz brieues mit den ersamen wisen dem burgermaister dem rat vnd den burgern allen gemainlich arm vnd rich der statt ze sant Gallen mit den ersamen wisen dem amman vnd den lantluten gemainlich arm vnd rich ze Appacell⁸ vnd mit allen den, die zu der obgenanten statt sant Gallen vnd dem land ze Appacell gehorent vnd verbunden sint ald noch zu in verbunden werdent, von disem huttigen tag hin, alz dirre brief ist geben, die nahsten zehen gantzi jar nach ain ander volle vs vmb disu nachgeschribenen stuk vnd artikel. Von ersten ist beredt vnd bedingot, ob das wari, das die obgenanten von sant Gallen oder die von Appacell ald die zu in gehorent vnd gehaft sint oder hie nach zu in gehaft vnd verbunden werdent, iemant vber ziehen an griffen oder beschadgen wolt in dem vorgenanten zil in den obgenanten stetten lendern oder gegninen ald iro lib oder gut durch die obgenanten stett lender oder gegninen ziehen furen triben oder tragen wolt, wer der war oder wie die genant oder gehaissen sint nieman vsgenomen, das wir ie danne als dik vnd wenn das ze schulden kumpt vnd wir des von ieman erindert oder ermant werdent, ân allen furzug vnd bi guten truwen vnd vnseren êran darzu tun vnd das redten wenden vnd weren sullen, so verre wir mugen, mit lib oder mit gut, alz ob die selb sach vnd getat wider vns vnd vnseru aigenu sach war, ân alle geuarde. Wir sullen och zu der obgenanten statt ze sant Gallen vnd zu dem obgenanten land ze Appacell vnd die zu inen gehorent vnd gehaft sint ald noch zu in gehaft vnd gehoren werdent, fruntlich wandlen werben vnd inen koff essen vnd trinken geben vnd si vnd das iro schirmen schutzzen vnd halten in den obgenanten stetten lendern vnd gegninen getrulich vnd ân alle geuarde vnd der obgenanten von sant Gallen vnd von Appacell ald die zu in ietz gehorent ald noch gehoren werdent offenen figent in den obgenanten stetten lendern vnd gegninen nut schirmen halten noch in dehain grôss koff geben noch zu furen in den vorgenanten jar ziln ân alle geuarde, doch mit namen mag vnser gnadiger herre graf Fridrich von Toggenburg⁹, ob er ioch iro figent wurd, das got lang wend, in den obgenanten stetten lendern vnd gegninen vngefarlich wandlen vnd werben selb zehend oder selb zwelft sines hofgesindes, doch den obgenanten von sant Gallen vnd den von Appacell vnd den, so ie dann zu in gehorent vnd gehaft sint, gantzlich vnschadlich. Beschach aber also da durch vnd zu den selben ziten den obgenanten von sant Gallen oder von Appacell ald dehainem, der oder die in ie dann zu gehorent, von dem obgenanten vnserm herren grâf Fridrichen ald sinem hofgesind dehain schad an lib oder an gut, wie sich der gezug vnd das kuntlich wurd, den selben schaden vnd getat sullen wir den obgenanten von sant Gallen vnd von Appacell vnd den iren, so ie dann zu in gehorent, gantzlich bekeren vnd ablegen ân all zusatz vnd ân all widerred. Och sont mit namen die obgenanten von sant Gallen vnd die von Appacell noch die, so ie dann zu in gehorent ald gehaft sint, dehain iro figent durch die obgenanten stett lender vnd gegninen nut schadgen noch zu griff tun ân geuarde. Och mugent die obgenanten von sant Gallen vnd von Appacell vnd die, so zu in gehorent, in fruntschaft durch die obgenanten stett lender vnd gegninen ziehen vnd wandlen zu den von Switz¹⁰ vnd zu ir aidgnossen, wenn su wellen, vnd die selben von Switz vnd ir aidgnossen her wider vmb in solicher fruntschaft vnd in gutem zu den von sant Gallen vnd von Appacell oder den iren ân alle geuarde. Beschach och, daz die obgenanten von sant Gallen ald von Appacell oder die iren ald die zu in ie dann verbunden sint vnd zu in gehorent, dehainost vnsers gelaitz begertin von Liehtistaig von sant Johannertal ald von Turtal oder von den, so zu vns gehorent, fur die vesti Yberg¹¹ hinuber gen Vtzna gen Grinow¹² ald zu den, die zu in gehorent, ald ob su oder die ie dann zu in gehorent vnsers gelaitz begertin von Grinow von Vtzna ald von den lendern vnd gegninen, so zu in gehorent, her wider vber fur Yberg die vesti vntz gen Liehtistaig oder vntz in die obgenanten lender vnd gegninen, das wir vnd die, so zu vns gehorent, an die das erfordert wirt, si vnd die iren, die zu in ie dann gehorent, ir lib vnd ir gut getrulich vnd sicher gelaiten sullen vnd wellen ân allen ir schaden vff vnser kostung fur aller manglichen vntz in ir gewarsami ân all ierung widerred vnd ân geuarde. Beschach och, da vor got lang sie, daz wir oder ieman andre, der zu vns gehort, der vorgenanten stuk vnd artikel dehaines vber furint, ez war mit koffen oder mit dehainen andern sachen, also daz die obgenanten von sant Gallen oder von Appacell ald die iren dunkti, daz in davon gebrest oder schad vf erstan wolti oder beschehen war, vnd si vns darumb zu in in ir statt oder land mantin, daz wir vnd och si ie danne ân als verziehen vnser erbern botten zu ain ander setzen sont ainen glichen zusatz zwen oder drig man von ietwedrem tail, vnd wes sich die dann gemainlich oder der mertail vnder in darumb erkennent vnd sprechent, es si vmb strâff vmb bussen oder wie daz furbaz verkomen vnd gewent werd, da bi sullen wir zu baider sidt beliben vnd dem gnug tun, war aber, daz die selben botten denn stossig ald schrittig wurdin, so sont die obgenanten von sant Gallen oder von Appacell ainen gmainen man vsser irem bund nemen zu ainem glichen zu satz, der vns denn ze bai- der sidt vmb die stossigen sach entschaidi, wolti aber der selb gemain man sich der sach also nut an nemen noch der sach mit sinem spruch end geben, so sol in gemainer iro bund darzu wisen vnd halten, daz ers tuge, ob er es vor mals nut versworn hat, niemans gemain man ze sinne. Wir haben och alle gemainlich arm vnd rich in disen obgenanten stetten lendern vnd gegninen vnd ieklicher vnder vns besunder willeklich gelobt mit vnseren truwen in aides wise vnd lobent mit disem brief, allu vorgeschribenn stuk bunkten vnd artikel war vnd stat ze haltenn ze tune vnd ze vollefurenn ân alle geuarde. Des alles ze offem warem vrkunde vnd stater sicherhait aller vorgenanten dinge vnd vergiht so haben wir die vorgenanten der rat vnd die burger gemainlich ze Liehtistaig der rat vnd die burger gemainlich ze Vtzna vnser stett insigel vnd wir die lantlut vnd lender sant Iohannertal vnd och daz Turtal vnser gemain insigel fur vns vnd fur alle die vorbenempten, so zu vns gehorent vnd in disem brief begriffen sint, offenlich gehenkt an disen brief. Der geben ist an dem nahsten mantag vor sant Syman vnd sant Judas tag der zwelfbotten des jares, do man zalt von Cristus geburt vierzehenhundert jar vnd darnach in dem funften jare.