Allen^a den, die disen brief ansehent oder horent lesen, kund ich Heini von Boppensêll¹ vnd vergich offenlich mit disem||
brief, als ich ze lehen hatt von den ersamen frowen der aptissenn vnd dem conuent ze Wurmspach² den||
hof ze Ottelffingen³ mit aller zugehord vnder Regensperg⁴ genant Eberlis hub nach des briefs sag, den||
ich darumb vber mich geben hatt, won ich da den selben hof nit in solichen êren gehaben noch verzinsen moht nach dem, als ich mich mit minem brief verbunden hatt, daz da erber lut zwuschen den vorgenanten frowen vnd mir beredt vnd vertadingot hant, daz ich inen den selben hof vffgeben ledig vnd lôs gelassen hân, vnd han darumb geschworen ein gelerten eid liplich ze got vnd ze den heilgen fur mich vnd min elich wirtin vnd fur manglich von vnsern wegen, die vorgenanten frowen noch ir hindersassen an dem selben hof niemer me ze irrenn ze sumenn noch ze bekumberren mit gericht noch an gericht noch schaffen ald ieman gunnen, daz ze tun, vngeuarlich, doch also, sy hant mir durch got gunnen vnd erlobet, in dem hus ze sin vntz ze ostren schierest kunftig vnd nit furbas. Vnd des alles ze warem vrkund han ich erbetten den edeln wolgebornen graf Otten von Tierstein⁵ vogt ze Regensperg, dz er sin insigel im vnd sinen erben vnschadlich fur mich gehenkt hat an disen brief. Der geben ist an sant Martis tag nach Crists geburt vierzehenhundert jar, darnach in dem funften jare.