Wir^a nachgenempten Vlrich Ladergarw von Ainwilr¹ vnd Hainrich sin elicher svn tun kunt vnd veriehin offenlich mit disem brieff fur vns||
vnd vnser erben allen den, die in sehent oder horent lesen, das wir mit guter vorbetrahtung vnd mit wolbedahtem mute von vnser redLlicher not wegen ainen akker gelegen vff Braitenveld² stôsset ainhalb an Schorantz hub³ andrunthalb an des Watlers gut vnd ze der||
driten siten an das gut ze Winkla⁴, das vnser reht aigen gewesen ist, mit grunt mit grât mit stok mit stain mit stegen mit wegen vnd mit allen rehten nutzzen vnd gewonhaiten vnd mit aller zugehord aines staten ewigen iemerwerenden kôffes reht vnd redlich verkôffet vnd ze kôffent geben habin den ersamen wisen Bartholome Blârer, Herman Schirmer vnd Rudolff Vorster von Gossôw⁵ ze disen ziten pfleger vnd besorger des hailigen gaistes spitâl ze sant Gallen⁶ zu des selben spitâls handen vmb siben pfund pfenning Costentzer munsse, dero wir gantzlich vnd gar von den selben pflegern vnd maistern vnd ôch von dem selben spitâl nach allem vnserm willen vsgeriht vnd bezalt sien vnd enpfangen habin vnd die an vnsern offenn nutz komen sint vnd bewendet an den stetten, da wir vnsern wachssenden schaden mit verkomen habin. Hiervmb so habin wir den selben akker mit allen sinen rehten vnd mit aller zugehorde, das gezuhet sich vff dry juchhart veldes, den obgenanten maistern vnd pflegern zu des vorgenamten spitâls handen offenlich an des hailigen riches strâsse von vnsern handen geuertgot vnd vfgeben, wie reht sitt vnd gewonlich was vnd als es kraft vnd maht sol vnd mag han ietz vnd hienach. Vnd habin vns ôch baid wilklich vnd frilich redlich vnd reht verzigen vnd verzihin vns mit vrkund dis brieffs fur vns vnd fur alle vnser erben des vorgeschriben akkers mit aller zugehorde aller aigenschaft aller kuntschaft aller gewer vnd zugnust lut vnd brieff aller vordrung vnd ansprachen aller reht vnd rehtungen, so wir ald vnser erben an dem zu dem vnd von des vorgeschriben akkers wegen mit aller zugehord vntz her vff disen huttigen tag, als dirre brieff ist geben, ie gehebt habin ald noch hinnenhin iemer gehaben oder gewinnen mohtin, vnd das wir noch vnser erben noch nieman von vnser wegen noch an vnser statt die obgenanten pfleger vnd maister noch dehain iro nachkomen noch den vorbenempten spitâl darvmb niemer me sollin noch wellin ansprechen vfftriben bekumberren bekrenken noch in dehain wise beswaren weder mit gaistlichem noch mit weltlichem geriht noch ân reht noch mit dehainen andren sachen ân geuerde. Wir habin ôch gelôpt vnd lobin mit disem brieff fur vns vnd vnser erben, des vorgenanten akkers mit aller zugehorde vnd des kôffes reht weren ze sine nach dem rehten vnd den obgenanten spitâl darvmb ze versprechent vnd ze verstand an allen stetten gen allermenglich ân iren schaden, als dik si darvmb angesprochen werdent mit dem rehten, ân geuerde. Vnd des ze ainer staten sicherhait so habin wir baid erbetten, won^b aigner insigel nit habin, den beschaiden Hainrichen Warman burger ze sant Gallen, das er sin insigel im selb vnd sinen erben ân schaden fur vns vnd vnser erben an disen brieff ge henkt hat. Geben ze sant Gallen an sant Martis abent in dem jar, do man zalt von gottes geburt tusent vierhundert vnd funff jar.