Item es ist och ze wissenn, was oder wieuil iedanne vnser gnadiger herr graff Ffridrich von Toggenburg vsserthalb den vorgenamten letzinen vnd vsserthalb den dorffern vnd willern, die mit namen an disem brief benemmet sind, luten hett ald im zugehorent, es sig von aigenschaft von vogtye von lehenschaft oder von pfandes wegen in der gegni vnd in den kraissen da vmb im Turgo gelegen, es sigint man oder frowen, den obgenamten von Appenzell alle namlich an ain rodelli verschriben sond werden, das man luter wissi, wer die sigint, vnd welh danne den obgenamten von Appenzell also an ain rodelli namlich verschriben werdent, die stând vnd sind ôch in frid vnd in der ainung, als der vorgeseit hoptbrief wol wiset vnd seit. Es sond och mit namen alle vnd ieklich lute, die inwendig den vorgenamten letzinen vnd in den dorffern vnd willern da vorgenamt sesshaft sind ald werdent nv ald hernach, vnd och die lute, die den obgenamten von Appenzell an das rodelli verschriben werdent, die letzinen ob Lutispurg 2 helfen rêtten vnd da tun, als die von Liehtenstaig die von sant Johanner tal vnd die vsserm Turtal gebunden sind ze tunne nach des obgenamten hoptbriefs lut vnd sag, vnd was och diser brief wiset ze tunne, das alles vnd iro ieklichs sollen wir och getrulich halten vnd laisten an alle geuerd, als wir das gelobt haben mit vnsern truwen an aides statt. Des alles ze warem vrkund vnd ze stater sicherhait hand die obgenamten vnser guten frund die burger ze Liehtenstaig disen brief von vnser bett wegen versigelt mit der burger der statte ze Liehtenstaig anhangendem aignen insigel, won wir aigens insigel nit haben, des och wir ietzgenamte burger ze Liehtenstaig offenlich veriehen. Dirre brief ist geben ze Liehtenstaig an dem nahsten samstag nach sant Martins tag in dem jar, do man zalt von gottes geburt tusent vierhundert vnd funf jare.