Wir graf Friderich von Toggenburg¹ graf ze Prettengo² vund zu Tafauß3 thun kund allermenigclichn vnnd veriechen offennlich mit dem brief, das wir fur vnnd^a vnnd all vnnser erben vnnd nachkomen ains rechten redlichen kauffs verkaufft haben vnd gebent ze kauffende mit krafft ditz briefs vnnsern lieben getreuen amman Wernlin⁴ vnnd Waltner von Rastral⁵, Hannsen Mathes, Hannsen Salteir vnnd Hannsen Hitzen von Saust⁶ inen allen funffen gemainlich vnnd vnverschaidenlich vnd iren erben vnnd nachkomen in ainer rechten gemainschafftwise vnnsern aigen hof gelegen ze Saust, dem man spricht der groß maigerhof, mit dem korn vnd schauf zechenden daselbs, der selben baid zechennden der kilchn ze Saust oder fierdentail zu gehoret vnnd den obgenanten keuffer die drutail vnnd nun hinfur zu gehoren sollent, der selbe hof vnns jerlich golten hett vnd noch jerlich giltet sechzehen phunt phennig Costentzer muntz, vnnd auch mit disen nachgeschriben guter, die auch in disen obbenanten hof gehorent, des ersten ain wise haiset Prada Praden⁷ gelegen vnder der strauß, als man von Kublins⁸ gen Saust get, ain wise lit vnnder den husner ze Pastral⁹, die wisen die dem obgenanten hof zu gehorent vnnd in der Alben¹⁰ gelegen sind, so den vier juchauten ackers, sind auch gelegen vnnder Rastral, aber drü stuckh, die zway vnnder der kilchen ze Saust, so haysset das dritt stuckh Munttain¹¹, die dreu stuckh thund ain juchart ackers, item ainen ackher haysset Seyun¹² vnnd ain acker bey dem prun(eⁿ ze Trunig¹³, disen vorgenanten hof mit den obgenanten zwain zehennden mit wissen vnnd ackner, so vorgeschriben sind, vnnd dar zu mit allen anndern gutern nutz gultn zinsen ackern holtz veld wasser wun vnnd waide vnnd mit zwingen bennen mit allen begriffnen rechten vnnd gewonnheiten nichts außgenomen noch vorbehept, es sey benempt oder vnbenempt, das zu dem vorgenanten hof vnnd darin gehoret von recht oder von gewonhait, haben wir egenanter graf Fridrich den vorgenanten personen allen zu kauffende gegeben vmb zwayhundert vnd viertzig lb. gueter phenning Costenntzer muntz, der wir von inen gar vnnd ganntzlich bezalt vnnd gewert sein vnnd sy in vnsrn nutz vnnd fromen bewenndet haben. Wir vnnd all vnnser erben vnnd nachkomen sollen auch der vorgenanten kauffer^b vnnd in allen stetten, wo vnnd wen sy es noturfftig werdind, als recht ist, on geuerde. Es ich auch nemlich in disem kauf bedingt vnnd beret, das wir obgenanter graf Fridrich von Toggenburg vnnd vnnser erben vnnd nachkomen den vorgeschribnen hoff mit allen seinen gutern vnd zu gehorden, als vorgeschribnen staut, vmb die egenanten personen oder vmb ir erben vnd nachkomen oder vmm den, in wez handen er denn zu den zeiten stat, widerkauffen mugent samenthafft auch mit zwayhundert vnd viertzig lb. phenning gueter Costentzer muntz hinnanthin, wellichs jars vnd tags wir wellend vnd inen die summ geltz also gebent vnd richtent vor sannt Johanns tag ze sungichtn an den zins des kunfftigen jares vnnd darnnach nit denen mit dem zins des nachgeenten kunfftigen jars, des wider kauffs sy vns auch also gehorsam vnd gebunden sein sollend. Mit vrkund ditz briefs, der mit vnnserm hanngenden insigl besiglet ist. Auch verjechen wir obgenanten keuffer warhait dez widerkauffs, daz wir vnd vnnser erben vnnd nachkomen dem obgeschriben vnnserm gnedigen herrn von Toggenburg seinen erben vnd nachkomen des also bey vnnsern trewen an geschworen aiden statt gehorsam sein sollent, wenn das an vns an vnser erben vnnd nachkomen oder an ainen vnder vns gefordert wirt. Vnnd des zu vrkund so habent wir allen funff erbetten den erbern beschaidnen Hansen Seger zu den zeitn vogt zu Mayenfeld¹⁴, das er seinen insigl fur vnns zu ainer gezeugnus in derre sach, wenn wir nicht insigl habend, im vnd seinen erben vnschadlich hat gehenckht an disen^c. Der geben ist zu Mayenfeld nach Christi geburdt in dem vierzehenhundertischen vnd funfften jarn an dem nechsten samstag vor sant Andres tag aines hayligen zwelffbotten.