Ich^a Hanni Getzenwiller burger ze sant Gallen bekenn mit disem brief, das ich erkofft vnd von dem erwirdigen gotzhus ze sant Gallen||
ze lehen hatt drissig schilling pfenning guter vngeforlicher Costenzer munsse jarlichs zinses ab vnd vsser grund grat aker wisen holtz||
veld wunn waid gezimberren vnd allen zugehorden des gutes genamt Stokmanshus¹ gelegen enzwischen Tablat², Horlachen¹ vnd dem bah,||
der von Buch¹ abher flusset, vnd dieselben drissig schilling pfenning jarlichs zinses han ich fur mich vnd alle min erben vmb aht vnd zwainzig pfund pfenning, der ich gantzlich bezalt bin, reht vnd redlich aines staten ewigen koffes verkofft ze koffenn gegeben vnd gefertget, als es nv vnd hernach wol krafft vnd maht haben sol vnd mag, miner lieben mumen Adelhaiten von Watt³ Hanns saligen von Watt wilunt elicher wirtinnen mit der bedingd vnd in dem rehten, das alle vnd ieklich besitzer vnd innehabende des vorgenanten gutes Stokmanshus, wer die sind ald werdent ietz ald hernach, derselben miner mumen Adelhaiten von Watt vnd ir erben vnd nachkomen ietz vff sant Gallen tag nahst kunftig nach datum diss briefs vnd darnach alle jar ewenklich ie vff sant Gallen tag ân allen vszug vnd ân alle widerred vor vs vor ab vnd vor menglichem ab vnd vss allen rehten nutzzen vnd gewonhaiten des egeseiten gutes Stokmanshus ze iro handen tugentlich bezalen sond ze sant Gallen in der statt drissig schilling pfenning guter vngeforlicher ie danne ze den ziten genger Costenzer munsse ald anderlay guter munss souil geltes wol wert da fur. Welhs jares das niht beschah, so mugent die egenant min mum ir erben vnd nachkomen vnd iro furwesen innehaber besitzer vnd niesser des egenanten gutes, wer die ie sind, vftriben noten vnd schadgen mit dem rehten vnd vff dem gute vnd vmb den zins angriffen vnd pfenden nach zinses reht. Ich vnd min erben, ob ich enbin, sond och bi guten truwen des obgeseiten jarlichen zinses vss dem vorgenanten gut vnd diss koffes weren sin vnd die egenant min mumen vnd ir erben darumb verstân an iro schaden nach des landes reht, gen wemm vnd wo si des bedurffent zum rehten, âne geuerd. Des alles ze gantzer sicherhait han ich egenanter Hanni Getzenwiller min aigen insigel fur mich vnd min erben offenlich gehenkt an disen brief. Geben ze sant Gallen ze mittem brâchet im jar, do man zalt von gottes geburt tusent vierhundert vnd sehs jare.