Ich^a Cunrat Schêrer waibel des statt ammans ze sant Gallen tun kunt vnd vergich offenlich mit disem brief allen, die in sehent oder horent lesen, das fur mich||
kament ze sant Gallen in der statt an dem nahsten zinstag nach vnser frowen tag ze mittem ogsten, do ich an statt vnd in namen Nycolausen||
Ruprehtz statt ammans¹ da selbs vnd von sinen wegen offenlich ze geriht sass, die erbern Vrsulla Tromlerin burgerin ze sant Gallen an||
ainem tail, Herman Schirmer vnd Rudolf Vorster phleger vnd maister dez spittals des hailigen gaistes ze sant Gallen² in der statt an dem andern taile, vnd offnot da die vorgenant Vrsulla Tromlerin mit fursprechen offenlich vor mir vnd dem geriht vnd sprach, si wolti den wingarten gelegen in dem Rintal enzwuschen Martpach³ vnd Rebstain⁴ vnd ainhalb stosset an des egenanten spittals wingarten vnd anderthalb an des von End wingarten, der ir lehen war von dem egenanten spittal vnd den si Hainrich Peter verlihen hett vmb den drittail alles dez wines, so iemer darinne wirt vnd werden mag, mit allen ir rehten vnd zugehorden dem obgenanten spittal vnd sinen phlegern willeklich frilich reht vnd redlich vnd och ledklich luterlich durch gottes vnd durch ir vnd ir vordern selan nutz vnd hailes willen vf geben vnd zu iro vnd des obgenanten spittals handen bringen, vnd batt mich eruarn an ainer vrtail, wie si das tun solt vnd moht, alz reht war vnd daz es kraft vnd maht hett vnd haben moht nv vnd och hie nach. Das tet ich vnd ward ertailt mit gemainer vrtail, das si ainen vogt nemen solt an dem ring, wen si wolt, vnd das si danne den vorgeschribenn wingarten mit allen rehten vnd zugehorden offenlich vor mir vnd dem geriht mit ir vnd ir vogtes handen vf geben solt zu der vnd ir^b der obgenanten phleger vnd maister vnd des obgenanten spittals handen, vnd das es danne also wol kraft vnd maht hetti vnd haben moht nv vnd hie nach. Do nam si ze vogt vber diz sache Cunrat Roseneggen den brotbeken och burger ze sant Gallen vnd gab och do^c stett die vorgenant Vrsulla Tromlerin mit ir vnd mit des egenanten Cunrat Roseneggen ir erkornen vogtes handen offenlich vor mir vnd dem geriht den vorgeschribenn wingarten iri reht mit allen rehten vnd zugehorden willeklich frilich reht vnd redlich vf zu der vnd in der obgenanten phleger Herman Schirmers vnd Rudolf Vorsters vnd zu des selben spittals handen, vnd verzech sich och do ze stett die vorgenant Vrsulla Tromlerin mit dem obgenanten irem vogt offenlich vor mir vnd dem geriht vnd verziht sich mit disem brief fur sich vnd alle ir erben des vorgeschribenn wingarten mit allen rehten vnd zugehorden aller aigenschaft aller lehenschaft aller kuntschaft alles vszugs aller gewer lut vnd brief alles gaistlichen vnd weltlichen rehtes aller vordrung vnd ansprachen aller reht vnd rehtung, so si oder ir erben, ob si enwar, an dem zu dem vnd von des vorgeschribenn wingarten wegen mit allen rehten vnd zugehorden ie gehebt hetti ald hie nach iemer gehaben oder gewinnen mohtint. Vnd ist dis alles beschehen vnd vollefurt reht vnd redlich mit allen den worten werken vnd getaten, so nach gewonhait vnd nach reht darzu gehorten ald horen solten vnd notdurftig waren vnd alz es kraft vnd maht sol vnd mag han nv vnd hie nach. Vnd des alles ze offem warem vrkunde aller vorgeschribenn dinge vnd vergiht so han ich Cunrat Scherer waibel da vorgenant von des gerihtes wegen min insigel mit vrtail gehenkt an disen brief. Darnach veriehent wir die obgenanten Vrsulla Tromlerin vnd Cunrat Rosenegg ir vogt in der vorgeschribenn sache ain gantz warhait aller der dinge, so von vns an disem brief da vorgeschriben stant, vnd ze merer sicherhait der selben dinge so han ich Cunrat Rosenegg da vorgenant in vogtes wise och min aigen insigel mir vnd minen erben ân schaden gehenkt an disen brief, vnd won ich die vorgenant Vrsulla Tromlerin aigens insigels niht han, so han ich erbetten den ersamen Eglolf Visch och burger ze sant Gallen, das er sin insigel fur mich gehenkt hat an disen brief, vnder des insigel ich mich in diser sache willeklich gebunden han, des och ich obgenanter Eglolf Visch mir vnd minen erben ân schaden vergich an disem brief. Der geben ist ze sant Gallen an dem vorgeschribenn zinstag in dem jar, do man zalt von Cristus geburt vierzehenhundert jar vnd darnach in dem sechsten jare.