Allen^a den, die disen brief ansehent oder horent lesen, kund ich Hans Ziler vogt ze Jonen¹ vnd vergich offenlich mit disem brief, daz||
ich an statt vnd in namen junkherr Hansen von Honburg vogtz ze Rapreschwil² offenlich ze gericht sass in allem dem rechten,||
als ob ich ze Jonen in dem hof ze gericht sasse, vnd kamenn da fur mich vnd fur offenn gericht Rudi Lopper ze einem teil||
vnd Johannes Vogler ze dem andern teil, vnd offnoten beid teil, daz sy mit enander vber ein komen sygind also, daz der vorgenant Rudi Loper fur sich vnd sin erben dem obgenanten Johannes Vogler vnd sinen erben ze einem rechten erblehen gelihen habe bi vier juchart aker minder oder me vngeuarlich genant in der Ow³, stosset einhalb an die Jonen⁴ vnd andrent an des Voglers Ow⁵, jarlich vmb ein mut kernen vnd zwei hunr erbzinses, vnd habe im der selb Johannes Vogler sin gut genant die Ow, daz daran gelegen ist, stosset andrent an die strass, mit aller zugehord gesetzt vnd verbunden in den vorgenanten erbzins, also daz der vorgeschriben mut kernengeltz vnd die zwei hunr erbzinses in den selben beiden Owen mit aller zugehord stan sol mit der bescheidenheit, daz Johannes Vogler oder sin erben vnd nachkomen, wer die vorgenanten guter innehat vnd nusset, jarlich vff sant Martis tag den mut kernen vnd die zwei hunr richten vnd weran sond an alle mindrung dem vorgenanten Rudi Loper oder sinen erben an ir schaden.War daz inen daz deheins jares verzogen wurde, so mohtin denn der selb Rudi Lôper oder sin erben die vorgenanten guter darumb angriffen nach des hofs recht, als dik daz ze schulden kame, doch Hansen Amptzen an zwein malter haber geltz vnschadlich, die er hat in des vorgenanten Johannes Voglers Ow, vngeuarlich. Vnd nach diser offnung tatenn vollefurten vnd bestatend die selben Rudi Lôper vnd Johannes Vogler die vorgeschriben sach gen enander an des gerichtz stab mit allen den worten vnd werchen, so darzu hort vnd notdurfftig waz vnd als gericht vnd vrteil gab, daz es billich krafft vnd macht hett nu vnd hienach. Vnd des alles ze warem vrkund han ich der obgenant vogt Hans Ziler min eigen insigel von des gerichtz vnd von beider teil bett wegen miner gnadigen herrschafft von Osterrich ir vogtrechten vnschadlich offenlich gehenkt an disen brief. Der geben ist an dem nachsten donstag nach sant Andres tag nach Crists geburt vierzehen hundert jar, darnach in dem sechsten jare. Hiebi warenn Peter Meijger schultheiss ze Rapreschwil⁶, Rudi Schnewli, Rudi Tobenstein, Vli Junkherr, Heinr. Vogler vnd ander erber lut.