Wir^a der schultheiss vnd der rât der statt ze Rapreschwîl¹ tunt kunt vnd veriechen offenlich mit disem brief,||
daz die pfleger vnd der spitâlmeister des spitals in vnser statt mit vnserm rât willen vnd gunst fur sich vnd||
ir nachkomenn recht vnd redlich verkofft vnd ze koffenn geben hant Hermann Kolomotzen burger ze Rapreschwil vnd sinen||
erben dis nachgeschriben rechtung in den vachern in den Hurden² mit aller zugehord, des ersten in dem Hêrweg den achtenden teil, item in froschvach den achtenden teil, item in Stoiris vffganden vnd niderganden vachen den achtenden teil, item in dem Loch den sechszehenden teil, item in dem niderganden Kinden vach den sechszehenden teil, dis alles galt dem spitâl jarlich vier mut kernen. Vnd herumb hât der vorgenant Herman Kolomotz geben vnd gewert funf vnd achtzig pfunt pfening gewonlicher vnd genger Zuricher muntz, die in des vorgenanten spitals notdurfft vnd guten nutz komen sind. Vnd darumb so hand die selben pfleger vnd spitalmeister von des vorgenanten spitals wegen sich gantzlich vnd luterlich fur sich vnd ir nachkomenn entzigen aller rechtung vordrung vnd ansprach, so sy vnd der obgenant spitâl hatten oder haben mohtin zu den vorgeschriben vachern, vnd hant och darzu mit guten truwen fur sich vnd ir nachkomenn gelopt vnd verheissen, dis koffs vnd der vorgeschriben rechtungen in den vorbenempten vachern wern vnd troster ze sin fur ledig vnd lôs, vntz daz der egenant Herman Kolomotz oder sin erben daran habent sind vnd daz sy ein gewêr dabi schirmet nach gewonheit vnd recht vnser statt ze Rapreschwil, an ir schaden vngeuarlich. Vnd des alles ze warem vrkund haben wir obgenanten schultheiss vnd rat ze Rapreschwil vnser statt insigel offenlich gehenkt an disen brief. Darzu haben wir geheissen die vorgenanten pfleger vnd spitalmeister, daz sy des selben spitals insigel och offenlich gehenkt hant an disen brief. Der geben ist an sant Niclaus tag nach Crists geburt vierzehen hundert jar, darnach in dem sechsten jare.