Wir^a Cun von gotz gnaden abt vnd der convent gemainlich des gotzhus ze sant Gallen¹ sant Benedicten ordens||
in Costentzer bistum gelegen, daz an alles mittel zu gehort dem stul ze Rom, tund kund vnd veriehent offenlich mit disem brief,||
das fur vns kam der from vest ritter vnd vnsers gotzhus lieber dienstman herr Herman von Landenberg von GriffLense² vnd gab vns obgenant(e^m abt Cunen der selb herr Herman vff an vnser hand die lehenschafft des zehenden ab vnd vsser dem hof ze Kyenberg³ vnd zehen schilling pfenning Costentzer muns vnd zwai hunr vogtrehtz vnd ander rehtungan tagwan vnd stekken, so er jarlich vsser dem selben hoff hetti, won er hetti dz alles geben dem gotzhus ze Tannikon⁴ an ain ewig liecht durch siner vordern vnd och siner sel hail willen. Vnd batt vns obgenanten abt Cunen vnd vns den convent der selb herr Herman gar ernstlich, das wir durch der dienst willen, die er vnserm gotzhus vnd vns getan hetti vnd noch tun wolti, den vorgenanten zehenden pfenning vnd hunrgeltz vogtrehtz tagwan stekken vnd ander rehtungan, so er vsser dem vorgenanten hof ze Kyenberg hetti, dem vorgenanten gotzhus ze Tannikon aigennen woltin, das die ersamen gaistliche frowan die abtissenn der convent des selben gotzhus vnd ir nahkomen das alles nu hinnenhin vnd ewenklich in nemen vnd fur reht ledig aigen haben niessen besetzzen vnd verlihen soltin vnd mohtin an vnser vnd vnser nahkomen sumen ierren vnd hindernust. Da hand wir angesehen des selben her Hermans dienst vnd habent ainhelleklich vnd mit gemainem rat vnsers cappittels dem vorgenanten gotzhus ze Tannikon den vorgenanten zehenden pfenning vnd hunr gelt tagwan stekken vnd ander rehtungan, so der selb her Herman vsser dem vorgeschribnen hof ze Kyenberg gehebt hat, geaigent vnd aigennant och den reht vnd redlich mit disem offnen brief fur vns vnd vnser nachkomen dem selben gotzhus ze Tannikon also, dz die ersamen gaistlichen frowan die abtissenn vnd der convent des selben gotzhus ze Tannikon vnd iro nahkomen nu hinnenhin vnd eweklich fur reht ledig aigen haben niessen besetzzen verlihen vnd entsetzzen sond vnd mugent als ander iro aigen gut an vnser vnser nachkomen vnd mangklichs von vnser wegen sumen ierren vnd hindernust gantzlich an alle geuerd. Vnd darumb so habent wir vns verzigen vnd entwert verzihen vnd entwerrent vns reht vnd redlich mit disem brief fur vns vnd vnser nachkomen zu des vorgenanten gotzhus ze Tannikon handen aller manschafft vnd lehenschafft des vorgenanten zehenden pfenning vnd hunrgeltz vnd vogtrehtes tagwan stekken vnd ander rehtungan vsser dem hof ze Kyenberg, so der selb Herman dem vorgenanten gotzhus ze Tannikon geben han^b, vnd aller reht vordrung vnd ansprach brief vnd rodel, die wir vnd vnser gotzhus von manschafft vnd lehenschafft wegen darzu gehebt hand oder gehaben mohtin. Vnd des ze offnem vnd warem vrkund dirr vorgenanter ding habent wir obgenanter abt Cun vnd wir der convent vnser abtye vnd vnsers cappittels insigel fur vns vnd vnser nahkomen haissen henken an disen brief. Geben ze Wil⁵ in vnsers gotzhus statt an sant Thomas abent apostoli nach Cristz geburt vierzehenhundert jar vnd darnach in dem sehsten jare.