Wir^a dis nachgenempten Rudolff, Vlrich, Johans vnd aber Johans, Cristina vnd Vrsell Cunratz salgen von Edlaswill² wilunt||
burgers ze sant Gallen elichu kind tugin kunt vnd veriehin offenlich mit disem brieff fur vns vnd fur alle vnser erben allen||
den, die in sehent oder horent lesen, das wir allu sehsu mit ainberem willen vnd mit guter vorbetrahtunge von vnser||
redlicher not wegen vnsern tail vnd vnsru reht des holtzes gelegen in dem Rôdmonten³ vnd ainhalb stôsset an den hof, den man nemet Ruti⁴, andrunthalb an Loch⁴ ze der dritten siten an Iohansen Schurpffen vnd ze der vierden vnd ze der funfften siten an des spitâls holtz ze sant Gallen⁵, das vnser reht lehen gewesen ist von dem erwirdigen gotzhus ze sant Gallen, mit grunt mit grât vnd mit aller zugehorde aines staten ewigen kôffes redlich vnd reht verkôfft vnd ze kôffent geben habin dem vorgedahten spitâl des hailigen gaistes ze sant Gallen vnd des selben spitâls maistern vnd pflegern in sinem namen vnd zu sinen handen vmb zwainzig pfunt vnd vmb nvn pfunt pfenning Costentzer muns, dero wir gantzlich vnd gar nach allem vnserm willen^b inen vsgeriht vnd bezalt worden syen vnd enpfangen habin vnd die an vnsern offenn nutz komen sint vnd bewendet an den stetten, da wir vnsern wachssenden schaden mit verkomen habin. Vnd habin ôch dem obgedahten spitâl vnd sinen pflegern vnd maistern in sinem namen vnd von sinen wegen das vorgeschriben vnser holtz mit allen rehten vnd mit aller zugehorde, als wir das bis her inne gehebt vnd genossen habin, vffgeben geuertgot vnd zu iro handen brâht, als reht sitt vnd gewonlich was vnd als es kraft vnd maht sol vnd mag han ietz vnd hienach. Vnd habin vns allu sechssu verzigen vnd verzihin vns gemainlich vnd iekliches besunder mit vrkund dis brieffs fur vns vnd fur alle vnser erben frilich vnd wilklich reht vnd redlich des vorgeschriben holtzes mit grunt mit grât vnd mit aller siner zugehorde aller aigenschaft aller lehenschaft aller gewer vnd zugnust lut vnd brieff alles rehten gaistlichs vnd weltlichs gerihtes aller reht vordrung vnd ansprachen aller reht vnd rehtungen, so wir ald vnser erben an dem zu dem vnd von des vorgeschriben holtzes wegen vntz her vff disen huttigen tag, als dirre brieff ist geben, ie gehebt habin ald noch hinnenhin in kunftigen ziten iemer gehaben oder gewinnen mohtin, vnd das wir noch vnser erben noch nieman von vnser wegen noch an vnser statt den selben spitâl vnd sin pfleger vnd maister in sinem namen vnd von sinen wegen darvmb nit furbas sollin noch wellin ansprechen vfftriben bekumberren bekrenken noch in kain wise beswarren weder mit gaistlichem noch weltlichem geriht noch ân reht noch mit dehainen andren sachen luterlich ân alle geuerde. Wir habin ôch gelopt vnd lobin mit disem brieff fur vns vnd vnser erben, des vorgenanten holtzes mit aller zugehorde vnd des kôffes reht weren ze sine nach landes vnd nach reht lehens reht ân geuerde vnd den vorgeschriben spitâl vnd sin maister vnd pfleger darvmb ze versprechent vnd ze verstand an allen stetten gen allermenglich ân iro schaden, wenn wa vnd wie dik su darvmb angesprochen vnd vffgetriben werdent mit dem rehten, ân geuerde. Vnd des alles ze offemm wârem vrkund vnd gantzer sicherhait so habin wir erbetten, won wir aigner insigel nit habin, den ersamen Iohansen Sarrin burger ze sant Gallen, das er sin insigel fur vns vnd vnser erben an disen brieff hât^c, doch im vnd sinen erben ân schaden. Geben ze sant Gallen an dem hailgen abent ze wihennahten in dem jar, do man zalt von Cristus geburt vierzehenhundert vnd sehs jar.