Wir^a die nachgenanten Hans Vogler von Zug¹, Hans Rist von Bern der junger, Rudolf Akkerman von Kussnach², Hans Rotenburg vnd Hainrich Tannmarder von Wakis³ tun kunt vnd veriehent offenlich||
mit disem brief allen, die in ansehent oder horent lesen, als vns die ersamen wisen gemain aidgnossen des bundes ob dem Bodense⁴ gehainmot vnd in iro banden den fursihtigen dem burgermaister||
vnd dem rat der statt ze sant Gallen geantwurt vnd beuolhen hant, vmb das wir Marken Roggen von Amptz⁵ gehainmot vnd geschatzt haben, vber daz er des vorgenanten gemaines bundes gelait||
hatt, daran wir vns vber sehen vnd wider si getan hant, won aber vns die obgenanten der burgermaister vnd der rat ze sant Gallen begnadot vnd vss iro banden gelassen hant von vnser vnd ander vnser frund vnd gesellen ernstlichen bett wegen, darumb so haben wir alle funf willeklich vnbetwungenlich vnd offenlich gesworn gelert aide liplich zu got vnd zu den hailigen mit vfgehabenen vingern, die vorgeschribenn vanknuss vnd getat niemer ze andenn noch ze aferrenn mit worten noch mit werken in dehain wise noch nieman von vnsern wegen gegen dem egenanten gemainen bund noch gegen nieman andre besunder, so zu dem selben bund gehort. Wir sagen och vnd lassen mit disem brief den obgenanten Marken Roggen willeklich frilich luterlich gantzlich vnd gar ledig vnd los der schatzung, alz wir in geschatzt hant, der gelubt vnd aid, so er vns gesworn hat. Wir haben och in den vorgeschribenn aide genomen vnd gesworn, wenne des obgenanten gemaines bundes botten ze sament koment vnd wir alle funf oder ainer vnder vns von den obgenanten dem burgermaister vnd dem rat ze sant Gallen ermant werdent fur iren bund ze komenn mit botten mit brieuen ald vnder ogen, das wir danne alle funf bi den aiden, so wir gesworn hant, ân allen furzug vnd widerred fur des selben obgenanten bundes botten komen sullen an die stett in irem bund, da si dann bi ain ander sint. Vnd wes sich danne des selben gemaines bundes botten gemainlich oder der mer tail vnder in erkennent sprechent vnd vns haissent tun von des vber varens wegen, alz wir in ir gelait vber varn haben, och von besorgnust wegen, alz su sich gegen vns versorgen werdent, vnd och von der kost vnd schadens wegen, so vber vns in der selben vanknuss gangen vnd geloffen ist, daz wir daz alle funf bi den vorgeschribenn aiden, so wir gesworn haben, dem selben irem spruch luterlich vnd gantzlich wâr vnd stat halten tun vnd vollefuren sullen vnd wellen ân alle geuarde. Vnd haben inen darumb vnd hieruber ze merer vnd besser sicherhait ze rehten burgen vnd wern geben vnd gesetzt diz nachgenenten erberen kneht Hansen Ebnater, Hansen Betzel, Hainrich Kanelbach, Hainrich Grâwen von Lutzern⁶, Janni Kung, Hansen Risten von Bern den eltern, Wernlin Rissin, Hainrich Rutiman von Ainsidellen⁷, Peter Chunen von Sibentail⁸, Rudolf Krummenakker, Wernlin Schuchman von Lutzern, den man nempt der Sailer, Cristan Truben vnd Cunrat Schlipfenower, die hant in alle drizehen vnuerschaidenlich gelobt ieklicher besunder mit siner truwe an aines rehten gesworn aides stat, vns alle funf darzu ze wisenn vnd ze haltenn, das wir hierumb des egenanten bundes vnd ir botten spruchen gnug tugen vnd die stat halten vnd vollefuren ân alle widerred vnd ân geuarde. War aber, da vor got sie, das wir den vorgeschribenen aide vber sahint vnd iren spruchen nut gnug tatin, so sullen wir vns alle funf danne an stett des egenanten bundes botten antwurten in iru band vanknuss vnd gewalt, da si vnser sicher sien, bi den vorgeschribenen aiden, so wir gesworn hant, vnd sont vns och darzu die obgenanten burgen vnd wern des wisen vnd halten bi den truwen, so si gelobt vnd verhaissen hant. Tatin wir vnd och die selben burgen daz niht, so sullen wir die vorgenemten funf alle vnd ieklicher besunder gen dem obgenanten bund vnd allen den iren rehtlos vnd erlos sin vnd haissen ân alle widerred, vnd hant och die obgenanten gemainer bund ob dem Bodense vnd die irn vns vnd och die obgenanten burgen vnd wern darumb an ze griffenn vnd ze notenn mit geriht vnd ân geriht, wie in fugklich ist, vber alle frihait buntnuss vnd gewonhait, alz vil vnd als lang, vntz in irem spruch, alz si hierumb getan hant, von vns gantzlich gnug beschiht vnd in ir schad, in den si da von koment, gantzlich vsgeriht vnd entschadgot werdent. War och das die obgenanten burgen vnd wern vns vorgenanten funf dem vorgenanten bund in iren gewalt vnd in iru band vnd vanknuss antwurtin, da si vnser sicher sint, so soltint danne die selben vorgenanten burgen vnd wern vmb disu vorgeschribenn gelubt vnd werschaft, so su getan hant, gantzlich ledig vnd los sin vnd haissen. Wir die vorgenanten funf haben och in den vorgeschribenn aide genomen vnd gesworn, die obgenanten burgen vnd wern alle vnd ir ieklichen besunder von der vorgeschribenn burgschaft vnd werschaft gantzlich ze losenn vnd vnschadhaft ze machenn, vnd hant vns darumb och vollen gewalt vnd gut reht an ze griffenn vnd ze notenn ze gelicher wise vnd in allen den rehten, alz vorgeschriben stât, alz vil vnd och als lang, vntz in iro schad gantzlich abgelait vsgeriht vnd bezalt wirt. Vnd des alles ze offem warem vrkunde vnd stater sicherhait aller vorgeschribenn dinge vnd vergiht so haben wir die vorgenanten funf selb schuldner erbetten den ersamen Rudolf Kung von Switz⁹, daz er sin insigel fur vns gehenkt hat an disen brief, vnder des insigel wir vns in diser sache willeklich gebunden haben, won wir aigener insigel niht haben, des och ich obgenanter Rudolf Kung mir vnd minen erben ân schaden vergich an disem brief. Darnach veriehent wir die vorgenanten burgen vnd wern alle gemainlich ain gantz warhait aller der dinge, so von vns an disem brief da vorgeschriben stant, vnd ze merer sicherhait der selben dinge so haben wir erbetten den wolbeschaidenn Waltin von Hub¹⁰ burger ze sant Gallen, das er sin insigel fur vns gehenkt hat an disen brief, vnder des insigel wir vns in diser sache willeklich gebunden haben, won wir aigener insigel niht haben, des och ich obgenanter Walti von Hub mir vnd minen erben ân schaden vergich an disem brief. Der geben ist ze sant Gallen an dem nahsten samstag nach sant Hylarien tag in dem jar, do man zalt von Cristus geburt vierzehenhundert jar vnd darnach in dem sibenden jare.