Ich^a Wernli Sepp von Switz¹ wilunt amman ze Appacell² tun kunt vnd vergich||
offenlich fur mich vnd alle min erben mit disem brief allen, die in sehent||
oder horent lesen, das mich die ersamen wisen der burgermaister vnd der||
rat ze sant Gallen gewert vsgeriht vnd bezalt hant die ahtzig alter Rinscher guldin gut an gold vnd swar an gewiht vnd funf phunt guter vnd gaber haller der nuwen munse, die si mir geben solten, alz si vnd die von Appacell mit den von Wangen³ verriht sint vnd ich also mit in vber ain komen bin. Darumb so lass ich vnd sagen fur mich vnd alle min erben die vorgenanten den burgermaister den rat vnd die burger gemainlich ze sant Gallen all ir erben vnd nachkomen vmb die vorgeschribenn ahtzig alter Rinscher guldin vnd funf phunt haller nuwer muns gantzlich quitt ledig vnd los vrkund diz briefs. Geben vnd versigelt ze end diser geschrift mit minem aigenn vfgetruktem insigel an sant Anthonien tag anno domini millesimo CCCCo septimo.