Ich^a Hans von Bonstetten¹ vergih vnd tun kund allermeilich||
mit disem brief, als Rudi Rumilli von Stettfurt² vnd Elsbeth sin eliche||
schwoster Vlis Torers eliche husfrow Hans Rumillis von Stettfurt||
seligen wilent eliche kind des fromen Hermans von Adlikon³ vnd min gemain gewesen sint von dem lib, da sint der ietzgenant Herman von Adlikon vnd ich aines lieplichen vnd fruntlichen wechsels inain komen, also das der obgenant Rudi Rumelli des selben Hermans von Adlikon vnd siner erben nv hinnenhin gantzlich wesen sol vnd die vorgenant Elsbeth min vnd miner erben och nv hinnenhin gantzlich wesen sol, vnd entzih mich gen dem selben Herman von Adlikon vnd gen sinen erben aller aigenschaft aller lehenschaft aller kuntschaft der luten vnd och briefen aller vordrung vnd ansprach vnd alles des rechten, so ich oder min erben zu des obgenanten Rudis Rumellis lib vnd gut ie gehatten oder hie nach iemer gehaben mochten. Vnd des ze vrkund han ich der obgenant von Bonstetten min insigel offenlich gehenkt an disen brief. Der geben ist an sant Gerdrud tag ze mittem mertzen nach Cristus geburt tusent vnd vierhundert jaren vnd darnach in dem sibenden jare.