Allen^a den, die disen brief ansehent oder horent lesen, kund ich Johans Huntzikouer, den man nempt Muller von Bromshouen, als der||
erwirdig herr her Johans von Bussnang probst des gotzhus ze sant Gallen mir vnd minen erben fur sich vnd sin nachkomen mit gunst vnd||
willen der erwirdigen herren abt Cuns¹ vnd gemains cappitels desselben gotzhus ze sant Gallen ains vngeuarlichen ewigen kouffs||
fur recht aigen ze kouffent geben hat ainlff schilling pfenning Costentzer muns iarlichs zinses vnd geltz ab vnd vsser der muli vnd mulistatt ze Bromshouen in dem dorff gelegen, diesselb muli vnd mulistatt min lehen von dem obgenanten probst vnd der probstye des egenanten gotzhus ze sant Gallen ist, als denn den kouff der kouffbrief wol wist, den ich dar vmb mit iren insigeln versigelten inne han. Da bekennen vnd vergich ich offenlich mit disem brief fur mich vnd alle min erben, das ich demselben minem herren dem probst von sant Gallen vnd allen sinen nachkomen an derselben probsty vnd ouch den obgenanten minen herren dem abt vnd cappitel desselben gotzhus vnd iren nachkomen fur mich vnd alle min erben den vollen gewalt vnd daz recht wissentklich vnd wolbedacht geben han vnd gib ouch ietz mit disem brief, also wenn ald welhes iars sy ald iro dehainer vnder inen ald ir nachkomen mir ald minen erben sament vnd mit enander werent vnd bezalent zehen pfund pfenning guter vnd genamer Costentzer muns ald anderlay guter muns, die denn ze Costentz dar fur geng vnd gab ist, vor sant Johans tag des Toffers ze sunwendi, daz ich vnd min erben vnd nachkomen, in der hand vnd gewalt denn dieselb muli vnd mulistatt stat, inen denn dieselben ainlff schilling pfenning geltz an allen furzug vnd widerred dar vmb wider ze kouffent geben vnd gantzlich ledig vnd los lassen vnd den kouffbrief, so ich ietz dar vmb inne han, vssher geben sont. Beschach aber, das wir vns desselben widerkouffs in dehain wis spertin, so sy den also von vns tun wolten, wenn sy souil geltz, als vorgeschriben ist, gen Costentz in die muns ald an den wechsel zu vnsern handen gelegent, so sol inen denn zestett die obgenanten ainlff schilling pfenning geltz darmit gantzlich ledig vnd los vnd der obgenant kouffbrief dannenhin, wo er gezogt wirt, tod vnd krafftlos sin an geuard. Wolten sy ouch denselben widerkouff dehaines iars also von mir ald minen erben ald minen nachkomen nach dem obgenanten sant Johans tag tun, des sollen wir inen ouch ân alle widerred gestatten in solicher mazz, als vor beschaiden ist, douch also, daz vns dieselben ainlff schilling pfenning geltz dar nach vff den nechsten herbst vnd ouch nit furbazz nach volgen vnd werden sont, alles luterlich an geuard. Vnd des alles ze warem offem vrkund, won ich denn aiges insigel nit han, so hab ich erbetten den fromen vnd vesten Jacoben von Langenhart ze den ziten schulthaiss ze Wil² vnd minen lieben getruwen swager Johansen den Korherren burger ze Wil, daz sy iro insigel fur mich vnd min erben vnd nachkomen offenlich gehenkt hant an disen brief, daz ouch wir dieselben Jacob von Langenhart schulthaiss vnd Johans Korherr also getan haben von siner bett wegen vns vnd vnsern erben vnd nachkomen vnschadlich. Geben ze Wil in der statt an mentag vor sant Georyen tag nach Cristi geburt vierzehenhundert iar vnd darnach in dem sibenden jare.