Ich^a Hans Ebneter von Schwitz¹ der elter bekenn mit disem brief, das sich gefugt, das ich vnd dis nachgenamt min gesellen vnd||
ander erber kneht, die aber vss diser zit geschaiden sind, vnser offen vigent suchten vnd och vnsern offen vigenden aberilten nomen, die sv||
vnsern frunden vnd den vnsern entwert hatten. Vnd denselben nomen vnd anders, so wir vnsern vigenden entwert vnd aberilet hatten da||
vmb ze Sulgo² in dem kraiss, entwert vnd aberilta vns der from vest herr Albreht von Burglen³ ritter vnd och die sinen, vnd wolten vns och darzu entsetzt haben vnser liber da ze Hondannen⁴ vnd ze Bischoffzell⁵, da si vns hin na ilten, vber das wir doch nit wisseten vt mit im ze schaffenn haben denn gutes. Vnd von des na ilens vnd entfromdens wegen wurden ich vnd die gesellen, die do bi mir warent, misshell vnd stossig mit dem obgenanten von Burglen vnd mit den sinen, vnd gabent och mir die nachgenamten gesellen alle vnd och die andern, die da warent vnd aber nv sid males tod sind, iro ansprach vnd misshellung vmb die sach gantzlich vnd gar vf ze minen handen. Vnd hervmb so vehta ich den obgenanten von Burglen vnd die sinen vnd hatt sv in forhten. Vnder die sachen hand aber nv da ze Roschach⁶ vff den tag, als diser brief ist geben, gar erberklich geworben vnd geredt dero von Costentz vnd och dero von sant Gallen erber wis botten vnd hand ie daselbens den obgenanten von Burglen vnd och mich vmb die sach vnd ansprach, so sich gesachet vnd gefugt hat von des na ilens wegen, gar vnd gantzlich luterlich vnd kreffteklich schleht gemachet vnd verrihtet also, das darumb noch^b von der sach vnd na ilens wegen noch von vt dem, so von des na ilens vnd von der sache wegen vferstanden ist, der obgenant von Burglen noch die sinen noch dehain sin helffer noch diener mich noch die minen noch dis nachgenanten gesellen noch die iren von derselben sache vnd von des na ilens wegen niemer me sollent noch wellent angesprechen bekumberren noch in kain wis beschwaren, ân alle geuerd. Vnd ensond och hinwider vmb, das ist beredt vnd han och ich das verhaissen, ich noch die minen noch die nachgenanten gesellen, won ich fur die versprochen han vnd och versprich mit disem brief, den obgenanten hern Albrehten von Burglen noch die sinen noch sin helffer noch diener noch ieman von sinen wegen von des vorgenanten na ilens wegen noch von vt des wegen, so sich da von gesachet hat, niht vehen angriffen noch schadgen in dehain wis, ân alle geuerd. Vnd han darvmb vnd da fur fur mich vnd die nachgenanten min gesellen von dem obgenanten hern Albrehten von Burglen enpfangen zwantzig pfund barer guter Costentzer pfenning. Vnd sind dis die gesellen, die bi der getat warent vnd noch in lib sind, fur die ich versprochen han vnd och versprich mit disem brief, Hansli in Stoken von Lutzern⁷, Hansli Bruder von Rotenburg⁸, Binfas, Cun von Rotenburg, Rudi Hermans von Gossow⁹, Rudi Rusch vss Gaiserwald¹⁰ vnd Bernhart Rafnolt. Des alles ze offem vrkund hat der wolbeschaiden Walther von Hub¹¹ der wirt burger ze sant Gallen disen brief von miner bett wegen versigelt fur mich vnd die vorgenanten gesellen, won ich insigels niht hab, doch im selb vnd sinen erben vnschadlich. Geben ze Roschach im jar, do man zalt von gottes geburt tusent vierhundert vnd siben jar, am nahsten zinstag vor sant Bonifacius tag im brâchet.