Wir der burgermeister die rat vnd burger gemeinlich der statt Ziurch tun kunt menlichem vnd veriechen offenlich mit disem brief fur vns vnd alle vnser statt nachkomen, als wir von dem hochgebornen durluchtigen fursten vnserm genedigen herren hertzog Friderich hertzog ze Osterrich ze Styr ze Kernden ze Krayn graf ze Tyrol etc. die vesti statt vnd burg Rappreswile an vnserm Zurichse gelegen mit aller zu gehort vmb acht tusent guldin je zwenzig gut alt plapphart fur einen gulden verpfendet hant nach vnsers pfandbriefes wisung, den wir her vmb versigelt haben, do haben wir mit guten truwen vnd bi den eiden, so wir vnser statt gesworn hant, gelopt vnd verheissen, das wir vnd vnser nachkomen vber zechen jar, so nach dat ditz briefes schierest nach ein ander koment, dem obgenanten hertzog Friderichen sinen brudern vnd vettern vnd iren erben vnsern genedigen herren etc. die vorgeseiten vesti statt vnd burg Rappreswil mit aller zu gehort vmb acht tusent guldin der vorgeschriben werschaft wider vmb ze ledgen vnd ze losen geben sullen nach den zechen jaren, wenn si wellent. Vnd wenne wir dann des geltes also vsgericht vnd bezalt sint, so sullen wir inen dz vorgeseit pfand mit siner zu gehorung wider geben vnd inantwurten vngefarlich. Wer och, dz die obgenant vnser genedige herschaft von Osterrich etc. in den nechsten kunftigen zechen jaren mit vnser der von Zurich eidgenossen vnd och mit vns einer ewigen vereinung vber kame, die friden buntnuss oder richtungen antreffen, so mugent si dz vorgenant pfand och in den selben zechen jaren, welches tages si wellent, vmb die egenanten acht tusent guldin mit der selben werschaft losen vnd ledgen, als vor ist bescheiden, an all geuerd. Wir die obgenanten von Zurich haben och bi den vorgenanten vnsern eiden verheissen, die egenanten burger vnd lute ze Rappreswile bi den friheiten vnd gewonheiten, als si von alter har komen sint, lossen ze beliben vnd si enkeiner vergangner sachen nicht lassen ze engelten in dehein wise an all geuerd. Vnd her vber ze einem offenn waren vrkund aller diser ding so haben wir vnser statt insigel offenlich gehenkt an disen brief. Der geben ist an dem nechsten zinstag nach sant Jacobs tag des heilgen zwelfbotten, do man zalt von Cristus geburt vierzehenhundert jar, dar nach in dem sibenden jar.