Wir^a Fridrich von gottes gnaden herzog ze Osterrich¹ ze Styr ze Kernden ze Krain graf ze Tyrol etc. bekennen vnd veriehen offenlich mit disem||
brief, das wir fur vns fur vnser lieben bruder fur vnser lieben vetter vnd fur vnser erben dien erbern wisen dem burgermeister dien raten vnd burgern||
gemeinlich der statt Zurich ze einem rechten redlichen vnd werenden pfand geben versetzet vnd ingeantwurt haben ane abslahen der nutzen vnser||
vesti statt vnd burg Rapreswil² an dem Zurichsê3 gelegen mit lut vnd gut mit allen frijheiten ehaften wirden vnd eren vnd mit aller rechtung, so dar zu gehort, als wir vnser vordern vnd vnser amptlut das genossen vnd her bracht haben, vmb acht tusent guldin guter vnd geber je zwenzig gut alt blaphart fur ein guldin, deselben geltes wir von inen gentzlich bezalt sijen, vnd all die wile, so wir oder vnser erben das obgenant pfand von dien von Zurich vmb die obgenanten acht tusent guldin mit der egenanten werschafft nicht erloset haben, so sullent si dasselb pfand inne haben besetzen vnd entsetzen nach ir notdurfft an all geuerd. Wer och, das wir obgenanter herzog Fridrich vnser bruder vnser vetter oder vnser erben mit dien egenanten von Zurich vnd mit iren eidgnossen hinnenhin in den nechsten zehen jaren, so nach datum ditz briefs schierest nach enander koment, einer ewigen vereinung vberkamen, die friden buntnuss oder richtungen antreffen, so mugen wir nach der selben vereinung in den egenanten zehen jaren, weliches tages wir wellen, das obgenant pfand mit allem recht, so dar zu gehort, vmb acht tusent guldin vnd mit der egenanten werung von dien von Zurich ledigen vnd losen. Beschahe aber die egenant ewig vereinung nicht, so mugen wir das obgenant pfand nach dien egenanten zehen jaren, weliches jare vnd tages wir oder vnser erben wellen, vmb die vorgenanten acht tusent guldin mit der egenanten werschafft von dien obgenanten von Zurich wider losen ane all widerred. Her uber ze einem offennen vrkund, das dis vorgeschriben alles war vest vnd stat belib, so haben wir der vorgenant herzog Fridrich vnser insigel fur vns fur vnser bruder vnd fur vnser vetter vnd fur vnser aller erben offenlich heissen henken an disen brief. Der geben ist an sant Jacobs abend, do man zalt von Cristus geburt tusent vierhundert vnd dar nach in dem sibenden jare.