Wir^a Peter vnd Wolfram frige herren von Hewen¹ gebruder veriechen vnd tund kunt allermenglichem mit disem brief, das wir von den fromen Wernher||
vnd Abrechten Holtzhusen gebruder genant Keller von Butzenschwile² an barem beraitem gelt ingenomen vnd enpfangen haben achtzig pfund pfenning||
vnd anderthalb pfund pfenning alles guter vnd genemer Costentzer muns, dero wir gantzlich vnd gar gewert vnd bezalt sint vnd da mit wir vnserm grossen||
schaden mit verkomen hand, vnd habent inan baiden gemainlich vnd vnuerschaidenlich vnd allen iren erben wissentklich vnd wolbedacht fur vns alle vnser erben vnd nachkomen aines vngefarlichen rechten redlichen ewigen koffes dar vmb ze koffen geben dis nachgeschribnen kernen haber vnd pfenning jarliches ewiges vssgendes geltes vnd an alles mindrung. Des ersten ab von vnd vsser dem gut genant Altegg³ gelegen zwischan Tuferschwile⁴ vnd Rindal⁵ jarlich vier schilling pfenning guter Costentzer muns, ab von vnd vsser ainem gut ze Schwartzenbach⁶ gelegen genant des custers von sant Gallen gut iarlich vier schilling pfenning Costentzer muns, ab von vnd vsser Lutholts schuppes ze dem Willa⁷ gelegen, die ietza hat der Golder, jarlich zehen viertel kernen zwai viertel haber Wil⁸ mess vnd zwelff schilling pfenning Costentzer muns, ab von vsser des Sporers schuppes ze dem Willa gelegen, die ietzo hat der Bischoff von Wil, jarlich sechs schilling pfenning Costentzer munss, ab von vsser des Botschis schuppes, die gehort in den kelnhoff ze Jonschwil⁹ gelegen jarlich drige schilling zwen pfenning Costentzer muns vnd ain viertel haber Wil mess, ab von vsser Hans Hobergs schuppes, die gehort in den kelnhoff ze Jonschwile gelegen jarlich funf schilling zwen pfenning Costentzer muns vnd ain viertel haber Wil mess ab von vsser Klain Hainis schuppes, die och gehort in den kelnhoff ze Jonschwile gelegen, funf schilling zwen pfenning Costentzer munss vnd ain viertel haber Wil mess, ab von vsser Hansen Kellers zwain schuppessen, die baid gehorent in dem kelnhoff ze Jonschwile gelegen, ab ainer^b jarlich funfthalb schilling pfenning Costentzer muns ain viertel viertel haber Wil mess vnd ab der andren jarlich drige schilling zwen pfenning Costentzer muns ain viertel haber Wil mess, ab von vsser der hub ze Bettnow¹⁰ gelegen, die och in den vorgenanten kelnhoff ze Jonschwile gehort, jarlich zehen schilling vier pfenning Costentzer muns zwai viertel haber Wil mess, ab von vsser Hunischwillers schuppes ze Jonschwile gelegen, die in den kelnhoff gehort, jarlich funf schilling zwen pfenning Costentzer muns ain viertel haber Wil mess, ab von vsser des Stroplers schuppes ze Jonschwile gelegen, die och in den vorgenanten kelnhoff gehort, drithalb schilling ain pfenning Costentzer munss ain halb viertel haber Wil mess, ab von vsser Gross Haini Waibels drigen schuppessen alle ze Jonschwile gelegen vnd alle drige gehorent in den vorgenanten kelnhoff ze Jonschwile die erst funf schilling zwen pfenning Costentzer munss ain viertel haber Wil mess, die ander jarlich funf schilling zwen pfenning Costentzer munss ain viertel haber Wil mess, die drit jarlich drige schilling zwen pfenning Costentzer munss ain viertel haber Wil mess. Vnd haben inan vnd allen iren erben das alles sament kernen haber vnd pfenning jarliches geltes vnd zinses also geben fur recht ledig vnansprachig aigen vnd och alles sament fur vssgend gut vor allen zinsen sturen diensten rechtungen an mindrung vnd an allen abgang. Wir habent inan och das alles also zu iren vnd ir erben handen bracht vnd gevertgot vnd si des in lipplich nutzlich gewaltsamy vnd gewer gesetzt, alz recht sitt vnd gewonlich waz vnd alz das billich kraft hat vnd haben sol nu vnd hienach. Nach dem allem so verzichen vnd entwerent wir vns an stett ledklich vnd frilich gegen denen vorgenanten Wernher vnd Abrechten Holtzhusz vnd allen iren erben vnd verzihent vnd entwerent vns och redlich vnd recht mit kraft diss briefs fur vns vnd alle vnser erben aller aigenschaft aller lehenschaft aller manschaft aller gewer aller kuntschaft aller zugnust lut vnd besunder aller briefen, so wir vnser erben ald nachkomen von demselben kernen haber vnd pfenning ewiges vssgendes geltz zu allem samet oder ze dehainen besunder inne hant oder hienach von vns vnsern erben oder ieman andra funden wurdent, das dann dieselben brief alle vns vnd vnsern erben vnnutz tod vnd kraftlos vnd denen vorgenanten Wernher vnd Abrechten Holtzhusz allen iren erben gantzlich vnschadlich sin sont an alle gevard, darzu alles rechten gaistlichs vnd weltlichs gerichts aller vordrung vnd ansprach, so wir alle vnser erben ald ieman andra von vnser wegen zu dem vorgenanten kernen haber vnd pfenning geltz ewiges zinses allem oder ze dehainen besunder ie gehatten oder hernach iemermer gewinnen ald erwerben mochten mit recht an recht von gewonhait ald von dehainerlay sach wegen, so ieman erdenken kan oder mag. Wir obgenanten Peter vnd Wolfram von Hewen hand och gelobt bi guten truwen vnd lobent och vesteklich mit disem brief fur vns alle vnser erben, des vorgenanten kernen haber pfenning ewiges vssgendes geltz gantzlich fur recht ledig aigen vnd diss redlichen koffs der vorgenanten Wernher vnd Abrechts Holtzhusz vnd aller ir erben gen allermenglichem vf gaistlichem vf weltlichem gericht, wenn wa ald wiedik si des notdurftig sint ald dar vmb angesprochen werdent, recht wern ze sint nach dem rechten nach aigens sitten vnd gewonhait luterlich an gevard. Vnd des alles ze warem offem vrkund vnd statter sicherhait so habent wir Peter vnd Wolfram von Hewen baid vnser aigny ingsigel offenlich gehenkt an disen brief. Der geben ist ze Schwartzenbach in vnser vesti an sant Andres tag des hailgen zwelfbotten, do man zalt nach Cristus geburt vierzehenhundert jar, dar nach in dem sibenden jare.