Wir^a die ainlof geswornen rihter der statt ze sant Gallen tuijen kund vnd veriehin offenlich mit disem brief allen den, die in ansehent oder horent lesen, das fur||
vns kament ze sant Gallen in der statt uff disen huttigen tag, als dirre brief ist geben, do wir offenlich ze geriht sâssen an des hailigen riches strâsse, dis nachgenempten||
erberen lute Anna Bongarterin Vlrich Edelmans salgen elichu wirtinne, der by junkherr Herman von Landenberg¹ ze Hagenwile² was, Walti vnd Els iru elichu kind an ainem||
taile vnd Johans Land burger ze sant Gallen vnd maister des spitâls³ daselbs ze dem andern taile, vnd staltent sich die obgenanten Anna Bongarterin vnd Els ir tohter vor vns vnd dem geriht mit Vlrichen Burgôwer burger ze sant Galen irem erkornen vogt, vnd do si sich also gestelt hatten, als inen vrtail vnd reht beschied, do offnotent si allu dru vnd der ietzgenempt vogt mit inen mit fursprechen vnd sprachen, das sy mit guter vorbetrahtunge vnd mit wolbedahtem mute von iro redlicher not wegen ain pfunt pfenning guter Costentzer muns jarlichs geltz vnd ewigs zins ab vnd vsser der schuposs gelegen ze Râtzenwille⁴, die man nemet des von Rôsenberg⁵ schuposs, stôsset ze allen sidten an des obgedahten spitâls guter von sant Gallen, vnd ab allem dem vnd vsser allem, so darin vnd darzu gehoret, es sye hus hofstatt akker wysen holtz ald veld, daz iro lehen wari von dem erwirdigen gotzhus ze sant Gallen, ains staten ewigen kôffes redlich vnd reht verkôffet vnd ze kôffent geben hettin dem vorgenamten Johansen Landen vnd sinen erben, ob er enwar, vmb funfzehen pfunt pfenning der vorgeschribnen muns, dero sy gantzlich vnd gar von im vsgeriht vnd bezalt worden warint vnd die sy an iren offnen nutzz bewendet hettint an den stetten, da si iren grossen schaden verkomen hettint. Vnd hettint im ôch daz vorgeschriben ain pfunt pfenning ewiges geltz vss vnd ab der vorgedahten schuposs mit aller zugehorde vfgeben geuertgot vnd zu sinen handen braht, als reht sitte vnd gewonlich war vnd als es billich vnd nach dem rehten kraft vnd maht hett vnd haben solt, mit solicher beschaidenhait vnd in dem rehten dinge vnd gedinge, das si vnd alle iro erben vnd nachkomen, in dero hand vnd gewalt die vorgeschriben schuposs iemer me kumpt inne hand ald niessent, dem vorgenamten Johansen Landen vnd sinen erben ald nachkomen nvn hinnenhin nach datum dis briefs allerjarlich ie ze sant Gallen tag ân alle minnrunge vszug vnd widerred vnd ân allen iren schaden ab vnd vsser der vorgeschribnen schuposs mit aller zugehorde ze rehtem jarlichem zins geben rihten vnd antwurten sollent ze sant Gallen in der statt ain pfunt pfenning guter Costentzer muns oder anderlay werschaft vnd muns dafur, die dann ie ze sant Gallen in der statt fur souil geltz genam vnd loffig ist, ân geuerde, vnd welhes jares das nit beschach vnd sich daz als lang verzug, das ain zins den andern erjegti vnd erlôffen hetti, so solti dem vorgenamten Johansen Landen sinen erben vnd nachkomen die obgeschriben schuposs mit allen rehten vnd zugehorden gar vnd gantzlich zinsvellig vnd fur reht aigen ledig vnd los verfallen sin, also das si der selbe Johans Land sin erben ald nachkomen vnd iro gewyssen botten vnd furwesen, wer die sind, dannenhin verlihen besetzen vnd entsetzen sont vnd mugent, wem wohin vnd wie dik sy wellent, ald es inen selber ze behaltent, ob si wellent, vnd da mit ze werbent vnd ze tund, was sy wellent vnd inen fugklich ist, als mit anderm irem aignen gut, vnd das sy die obgenamten Anna Bongarterin, Walti ir sun vnd Els ir tohter noch ir erben noch nieman von iro wegen daran nit ierren bekumberren noch bekrenken sollent noch wellent weder mit worten noch mit werken mit geriht noch ân geriht noch mit kainen sachen ân geuerde. Vnd also mit disen hieuorgeschriben dingen vnd gedingen verzigen sich do ze stund vor offemm geriht die obgenamten Anna, Walti vnd Els iru elichu kind vnd der egenamt vogt mit inen vnd verzihent sich allu dru gemainlich vnd iekliches besunder des vorgeschriben ainen pfundes pfenningen ewiges geltz vnd jarlichs zins ab vnd vss der vorgedahten schuposs aller aigenschaft aller lehenschaft aller kuntschaft gewer vnd zugnust lut vnd brief alles rehten gaistlichs vnd weltlichs gerihtes aller reht vordrung vnd ansprachen aller reht vnd rehtung, so sy ald iro erben an dem zu dem vnd von des vorgeschriben ainen pfunt pfenningen geltz wegen vntz her uff disen tag, alz dirre brief ist geben, ie gehebt hettin ald noch hinnenhin iemer gehaben oder gewinnen mochtin, vnd das sy gemainlich noch sunderbar noch iro erben noch nieman von iro wegen noch an iro statt den vorgenamten Johansen Landen noch sin erben darvmb nit furbas sollent noch wellent ansprechen vftriben noch in kain wyse beswarren weder mit gaistlichem noch weltlichem geriht noch ân reht noch mit dehainen andren sachen ân geuerde. Sy lôptent ôch do vor offemm geriht allu dru vnuerschaidenlich, des vorgenamten ainen pfunt pfenning geltz mit aller zugehorde vnd des kôffes reht weren ze sind nach landes reht vnd in vnd sin erben darvmb ze versprechent vnd ze verstand an allen stetten gen allermenglichem ân allen iren schaden, wenn wa vnd wie dik sy darvmb angesprochen vnd vfgetriben werdent mit dem rehten, ân geuerde. Vnd des ze ainem offemm wâren vrkund gebin wir die obgeschriben ainlof rihter disen brief mit vrtail versigelten mit dez gerihtes anhangenden insigel. So veriehen wir obgenanten Anna Bongarterin Vlrich Edelmans salgen elichu wirtinne, Walti vnd Elsi iru elichu kind vnd der vorgenamt vogt Vlrich Burgôwer ain gantz warhait dis kôffes vnd aller vorgeschribener dinge, vnd ze merer sicherhait der selben dinge vnd vergicht so habin wir obgenanten Anna, Walti vnd Els erbetten, won wir nit aigner insigel habin, den ersamen Othmar Wildrich vnsern fursprechen in diser sach ôch burger ze sant Gallen, das er sin insigel im selb vnd sinen erben ân schaden fur vns vnd vnser erben an disen brief gehenket hat. Vnd noch furbz ze merer sicherhait so henk ich Vlrich Burgôwer och min insigel von dirre vogtye wegen an disen brief, doch mir vnd minen erben vnschadlich. Der geben ward ze sant Gallen an sant Valentis tag in dem jar, do man zalt von Cristus geburt vierzehenhundert, darnach in dem ahtenden jare.