Wir die gemain ritterschafft zu Schwaben vnd wir der burgermaister rate vnd die burger gemainlich der statt zu Costentz verjechend vnd tund kund offenlich mit disem brief allen, die inn sechend oder horend lesen, von des kriegs wegen so wir vnd vnsre helffer vff ainsit vnd die erbern dero von Switz¹ landtlut der amman vnd gemains land zu Appazell² ir helffer vnd die zu inen verbunden warend vff der andern sit sament gehept hand, darumb vns vff baider sit der allerdurchluchtigist furst vnser gnediger herre herr Ruprecht von gottes gnaden Romischer kunig zu allen ziten merer des richs verricht vnd veraint hatt, da sullend vnd wellend wir von des vorgenanten kriegs wegen die obgenanten von Schwitz ire helffer noch die iren furbashin nitt vechen noch das afern noch si des engelten lassen in dehain wijse on geuarde. Geben vnd versigelt mit herr Hainrichs von Rosnegg³ frijen vnd ritters, Rudolfs von Fridingen⁴ vnd dero von Costentz insigel, an der nechsten mitwuch vor dem palmtag, do man zalt von gottes geburt tusent vierhundert vnd acht jare.