Ich^a Peter von Hewen ritter vnd Wolfran von Hewen¹ sin bruder frie||
herren veriehent offenlich mit disem brief, das wir recht vnd redlich fur||
vns vnd vnser erben verkoffet hant den erberen knecht Kopp Hainin vzz||
der Ach², der vnser aigen ist, vnd hant den mit lib vnd mit gut vnd mit aller zugehord fur recht aigen ze koffen geben dem edeln vnserm lieben vetter graf Fridrichen von Toggenburg³ vnd allen sinen erben vmb zwaintzig pfunt vnd zehen schilling pfenning Costentzer muns, des selben geltes wir ouch gar vnd gentzlich von im bezalt vnd gewert sigen, vnd dar vmb so haben wir vns fur vns vnd alle vnser erben gen dem vorgenanten vnserm vetter graf Fridrich vnd gen allen sinen erben an dem vorgenanten Kopp Hainin verzigen vnd verzihent vns ouch redlich vnd recht mit disem brief aller aigenschaft aller lenschaft aller manschaft aller besatzung aller gewer aller kuntschaft aller zugnust lut vnd brief alles rechten gaistlichz vnd weltlichz gerichtes vnd aller der zuspruch, so wir oder vnser erben zu sinem lib oder gut hinnenthin iemer me kondin oder mohtin gewinnen oder gehaben vor tod oder nach tod, vnd habent ouch den vorgenanten vnsern vetter graff Fridrich von Toggenburg in liplich nutzlich hablich gewer gesetzet vnd setzent in vnd sin erben dar in hablich mit disem brief. Vnd des alles ze warhait so hant wir Peter vnd Wolfran von Hewen da obgenant vnsry insigel offenlich fur vns vnd vnser erben gehenket an disen brief. Der geben ist ze Schwartzenbach⁴ an sant Jacobs abent nach Cristy geburt vierzehenhundert jar vnd dar nach in dem achtoden jar.