Ich^a Rudolf der Mayger von Altstetten¹ tun kunt vnd vergich dez offenlich mit dissem brief allen den, die in an sehent oder horent lessen,||
dz fur mich kam Claus in der Laingrub burger ze Altstetten vnd offnet vnd vergiach da offenlich vor mir, dz er mit guter zittlicher vorLbedrachtung vnd mit wolbedachtem mut fur sich vnd all sin erben sinen wingarten gelegen an der halden ze dem klainen Hassla² stosset||
ainhalb an Rudis Hofakkrers wingarten vnd anderhalb an Hansen Mantzen wingarten mit reben mit stikeln mit trutern mit bogen mit zunen mit marken mit allen rechten fruchten nutzen ehaften vnd guten gewonhaiten vnd gantzlich mit allen zugehorden benempten vnd vnbenempten aines staten ewigen vnd jemer werenden koffes verkoft vnd recht vnd redlich ze koffent geben hett dissen nachgeschribenn erberen luten Rudin Vogelwaider burger ze sant Gallen, Elsabeiten siner elichen wirtinen, Hanslin, Vlin, Greten vnd Annen iren elichen kinden, die och do ze mal vnder ogen stundent, vnd iren erben vmb zehen phunt phenning alles guter Costentzer munse, der er och von inen gar vnd gantzlich gewert vnd bezalt war nach allem sinen willen vnd guten nûtz, der selb wingart von mir sin lehen war, vnd batt mich ernstlich, dz ich den vorgeschriben wingarten ze Hassla von siner hand vf nam an min hand vnd in lih den vorgenanten Rudin Vogelwaider, Elsabeiten siner elichen wirtinen, Hanslin, Vlin, Greten vnd Annen iren elichen kinden vnd iren erben. Daz tett ich vnd erhort sin ernstlich bett vnd leh den vorgeschriben wingarten gelegen ze den klainen Hassla mit aller zu gehort vnd lih in mit vrkund vnd mit kraft dis briefs den vorgenanten Rudin Vogelwaider, Elsabeiten siner elichen wirtinen, Hanslin, Vlin, Greten vnd Annen iren elichen kinden allen sament ze ainer rechten gemaind vnd in rechter gemaind wis, vnd also verzeh sich do der vorgenant Claus in der Laingrub dez vorgeschribenn wingarten gelegen ze Hasla mit aller zu gehort vnd verziht sich mit dissem brief fur sich vnd all sin erben aller aigenschaft aller lehenschaft aller manschaft aller kuntschaft aller zugnus aller bewissung aller gewer lut vnd brief alles gaistlichen vnd weltlichen rechtes aller vordrung vnd ansprach aller recht vnd rechtung, so er oder dehain sin erben an dem zu dem vnd von dez vorgeschribenn wingarten wegen gelegen ze Hassla ie gehept hant oder hienach jemer gehaben oder gewinnen mochtint. Der vorgenant Claus in der Laingrub hat och gelopt mit siner guten truw vnd lobet och mit dissem brief fur sich vnd all sin erben, dez vorgeschriben wingarten vnd och dez kofs recht gut vnd getruw wer ze sinne nach dez landes recht vnd den obgenanten Rudin Vogelwaider, Elsabeiten sin elichen wirtinen, Hanslin, Vlin, Greten vnd Annen iru elichy kind darvmb ze versprechent vnd ze verstanne an allen stetten vnd gen aller^b manglich an allen iren schaden, wenn wa vnd wie dik sy darvmb^c dem rechten angesprochen geschadgot oder vf getriben werdent. Vnd ist dis alles beschehen vnd volfurt recht vnd redlich mit allen den worten werchen gebarden raten vnd getaten, so von recht vnd von gewonhait darzu gehorten vnd horen soltent vnd notdurftig warent vnd als ez kraft vnd macht sol vnd mag han ietz vnd hienach. Vnd dez alles ze offem warem vrkund vnd stater ewiger sicherhait so han ich Rudolff Mayger min insigel von der lehenschaft vnd von dez obgenanten Claussen in der Laingrub ernstlichen bett wegen offenlich gehenkt an dissen brief. Der geben ist an sant Jakobs tag des hailgen zwelfbotten in dem jar, do von Cristus geburt warent tussent wierhundert vnd darnach in dem achtenden jare.