Wir^a die nachgenanten Peter von Hewen ritter vnd Wolffran von Hewen¹ gebruder baid friien veriehen vnd tunt kunt manglichem mit disem brief, daz ich Wolffran||
von Hewen fur mich vnd alle min erben dem wolbeschaidenn Hainrich Zwiken burger ze sant Gallen vnd sinen erben vff ainen widerkoff reht vnd redlich ze koffenn||
geben han vsser etlichen gutern ze Nidern Vtzwille² vnd ze Linggenwille³, die vnser pfant sint von dem gotzhus ze sant Gallen, vnd vsser den sturan da selbund,||
des ist funf phunt phenning ân siben vnd zwainzig phenning guter vnd genamer Costentzer muns vnd funf mutt gutes vnd vngefarliches habern Byschoffzeller⁴ messes, die selb stur ietz vff disen maiien in disem jar, alz dirre brief ist geben, halb gefallen ist vnd das ander ietz darnach vff den herbst nahst kunftig gefelt. Vnd ist der koff beschehen vmb sibenzig phunt siben phunt vnd nundhalben schilling phenning guter vnd genamer Costentzer muns, dero ich obgenanter Wolffran gantzlich vnd gar bezalt vnd gewert bin vnd minen schaden da mit verkomen han. Vnd daz selb jarlich gelt vsser den sturan sol er vnd sin erben aller jarlich innemen haben vnd niessen ân manglichs ierung, alle die wile der widerkoff nut beschehen ist, vnd sullen ich noch min bruder noch vnser erben noch vnser amptlut noch nieman andre von vnsern wegen si daran nut sumen in dehainen weg ân arge list an dem vorgeschribenn gelt vss den sturan, vnd setzent si och darumb in reht liplich vnd nutzlich gewer. Vnd da hand wir vns baid verzigen vnd entwert verzihent vnd entwerent vns och mit disem offenn brief fur vns vnd alle vnser erben des vorgeschribenn geltz vsser den sturan jarlich ze gebenn von Nydren Vtzwille vnd Linggenwille aller reht vordrungen vnd ansprachen, so wir daran vnd darzu von der verpfandung wegen ald von ander sachen wegen dar an gehebt hant ald vnser erben daran gehaben mohtint, gen dem vorgenanten Hainrich Zwiken vnd sinen erben vntz an den widerkoff alles gaistlichen vnd weltlichen gerihtz, da mit wir in oder sin erben daran in dehainen weg gehinderan oder bekumberren mohtint. Wir sullen vnd gelobent och vesteklich mit disem brief fur vns vnd alle vnser erben, dis vorgeschribenen jarlichen geltz vnd stur vsser den vorgenanten Nidra Vtzwillern vnd Linggenwillern gutern in aller vorgeschribener wise des vorgenanten Hainrichs Zwiken vnd siner erben gen aller manglichem allenthalben, wenne wa vnd wie dik si des notdurftig sint vnd daran von ieman mit dem rehten gesumpt ald geieret wurdint, reht weren ze sinde nach dem rehten vnd nach des landes sitten vnd gewonhait vnd in des denne entrihen vnd ân iren schaden gantzlich ledgen sont ân geuarde, alle die wile der widerkoff nut beschehen ist. War och, daz die lut, so die guter hant, darus die stur jarlich vff die zwai vorgeschribenen zil dem vorgenanten Hainrichen Zwiken ald sinen erben jarlich nut volleklich vsrihtint noch gabint, so gebent wir inen die reht, die wir zu den luten habent, vnd vollen gewalt mit disem brief, si an ze griffenn mit pfendenn heften vnd noten, wie si das getun kunnent, vnd darzu sullent inen denn vnser amptlut vnd kneht darzu beholffen sin, das si darumb ân iro schaden vsgeriht werdent, ob si daz an vns vordrent. Och hant wir baid erbetten den erwirdigen vnsern gnadigen herren her Chunen von gottes gnâden abt des gotzhus ze sant Gallen⁵, daz er sinen gunst vnd willen zu disem koff vff ain widerkoff geben hat, doch im vnd sinen nachkomen vnd dem vorgeschribenn gotzhus ze sant Gallen an der losung diz vorgeschribenn jarlichen geltz vnd stur vsser den vorgenanten gutern vnd an allen andren rehten vnd gewonhaiten gantzlich vnschadlich vnd vnuergriffenlich. Wir Chuno von gottes gnâden abt des gotzhus ze sant Gallen veriehen an disem brief, das wir von der obgenanten her Peters vnd Wolffran von Hewen bett wegen vnsern gunst vnd willen geben haben zu dem vorgeschribenn koff, so die selben von Hewen geben hant dem obgenanten Hainrichen Zwiken vnd sinen erben in der wise, alz vor beschaiden ist, doch vnserm gotzhus vnd vns vnsern nachkomen an der losung des vorgeschribenn geltz vsser der stur der vorgenanten gutern vnschadlich, ob es ze schulden kami. Vnd des ze vrkund haben wir vnser abtye insigel offenlich gehenkt an disen brief. Och habent wir obgenanten her Peter vnd Wolffran von Hewen gebruder ze offem vnd warem vrkunde aller vorgeschribenen dinge vnd stater sicherhait baid vnseru insigel fur vns vnd vnser erben offenlich gehenkt an disen brief. Der geben ist an dem nahsten fritag nach dem hailigen vffart tag vnsers herren Yesu Cristi, do man zalt von gotz geburt vierzehenhundert jar vnd darnach in dem nunden jare.