Ich^a Nicolaus Rupreht von sant Gallen burger ze Lindow¹ bekenn offenlich mit disem brief fur mich vnd fur all min erben vnd nachkomen, das ich mit||
wolbedahtem mut vnd durch mines bessern nutzzes willen verkofft hab ain pfund pfenning Costentzer munsse jarlichs gelts vnd ewigs zinses ab||
vnd vsser aker holtz veld wisen wunne waid wasser vnd wasserflussen stoken stainen grunde grâte gebomen fruhten gezimberen nutzzen zinsen rehten gewonLhaiten vnd allen zugehorden mines hofes genamt zum Wiyer² vnd des gutes genamt Buch², so darzu horet, alles gelegen bi Huntwiller³ tobel, stôsset an die Ruti², an die Haggen⁴, an Hindrenberg⁵, an das Lên⁶ vnd an Hopsermos², die min lehen sind von dem erwirdigen gotzhus ze sant Gallen, vnd hab dasselbe ain pfund pfening jarlichs gelts vnd ewigs zinses dârab vnd darus aines staten ewigen kôffes ze kôffenn gegeben an den buw der lutkilchen ze Huntwilr vmb ahtzehen pfund pfenning guter Costentzer munsse, vnd bin och des geltes gantzlich vnd gar gewert vnd bezalt von den kilchen maijern dâselbens, vnd hervmb sond bi guten truwen, won das in dem kôff bedinget ist, ich vnd min erben vnd nâchkomen vnd alle buwlut besitzer vnd niesser des egenamten mines hofes vnd gutes, wer die sind ald werdent nv ald hernach, den kilchenmayern der egeseiten kilchen ze Huntwilr vnd iro nachkomen, welh die ietz sind ald hernach werdent, ietz uff sant Gallen, der nv schierest kumet nach datum diss briefs, vnd dannenhin iemer ewenklich allerjarlich ie vff sant Gallen tag vor vs vor ab vnd vor menglichem ab vnd vsser allen nutzzen rehten vnd zugehorden des obgenamten mines hofes vnd gutes ân allen iro vnd der egeseiten kilchen schaden ân alle widerred ân allen abgang ân alle infall vnd vszug geben vnd inen ze Huntwilr ze der kilchen antwurten ain pfund pfenning guter vnd genamer Costentzer oder sant Galler ietziger nuwer munss vnd werung ald anderlay ie danne ze ziten guter genger munsse souil geltes wol wert dafur. Welhes jares aber ich min erben ald nachkomen oder buwlut besitzer vnd niesser des vorgenamten mines hofes vnd gutes dâran sumig warint, wie ald von welherlay sachen wegen daz wari oder wie sich das fugti, so sond vnd mugent die kilchenmayer ze Huntwilr, welh iedanne sind vnd wer inen des hilffet, ieklichs jares ie nach sant Gallen tag, wenn si wellent, mich min erben vnd nachkomen vnd die buwlut besitzer vnd niesser des vorgenamten mines hofes vnd gutes allesament ald welh si wellent besunder vftriben vnd schadgen vnd vff dem vorgenamten minem hof vnd gute pfenden vnd die angriffen vnd verkoffen nach sogtaner zinse reht vnd gewonhait mit gaistlichen vnd mit weltlichen gerihten gemainlich ald mit wedrem si wellent besunder bis an volbezalung der zinse, so danne gefallen vnd niht gewert sind, vnd och der schaden, so daruf lôffent von vorerzalter sachen wegen. War och, das ich min erben ald nachkomen ald ieman, wer der wari, nvhinnenhin ab hof oder gute da vorgenant iht verkofftint gabint ald verschuffint oder in dehain wis verandertint lutzel ald vil, das sol doch der obgenamten kilchen Huntwilr an jarlichem gelt vnd zins da vorgeseit dehain infall noch schaden niht fugen, won ir mit rehter bedingd dasselbe jarlich gelte vnd zins iemer eweklich gan vnd werden sol vor allen zinsen vnd vor menglichem. War och, das ich min erben ald nachkomen jetz hettint oder hernâch gewunnint ald erkofftint iena dehain ander gut, es war aigen ald lehen, vff das wir die vorgenamten kilchen des vorgenamten jarlichen geltes vnd zinses bewisen vnd versorgen woltint vnd da es och erber lute vngeforlich derselben obgenanten kilchen gelegen vnd gewiss duhti, das mugen wir wol tun. War och, das ieman, wer der wari oder wurd, nv ald hernach, er war gaistlich ald weltlich, die egenamten kilchen oder ir kilchenmayer ald ieman von derselben kilchen wegen an disem koff vnd jarlichem zinse da vorgenant trengen sumen ierren ald das ansprechen tati mit dem rehten ane geuerd, es war von lehenschafft ald von dehainerlay andrer infall ald sachen wegen, wie die genamt oder gehaissen sind ald werdent, so sond bi guten truwen ich min erben vnd nachkomen innehaber besitzer vnd gwaltsamer mines hofes vnd gutes da vorgenant die obgenamten kilchen vnd ir kilchenmayer darvmb an allen iro schaden versprechen vnd verstân vnd inen das entrihen vnd vnansprachig machen, als dik es iemer ze schulden kumet, an alle geuerd, das ist alles bedinget. Vnd ze warem offem vrkund vnd ze gantzer sicherhait aller vnd ieklicher vorgeschribner ding vnd bedingd han ich obgenanter Nicolaus Rupreht min aigen insigel fur mich fur min erben vnd nachkomen buwlut besitzer vnd niesser da vorgeseit offenlich gehenkt an disen brief. Der geben ist ze sant Gallen an sant Johans abent des Toffers ze sunnwendi im jâr, dô man zalt von Crists geburt vierzehenhundert jâr vnd darnach im zehenden jare.