Johannes episcopus servus servorum dei dilecto filio .. cantori ecclesie Constantiensis salutem et apostolicam benedictionem. Sincere devotionis affectus, quem dilectus filius Vlricus Goesler laicus Constantiensis diocesis ad nos et Romanam gerit ecclesiam, promeretur, ut votis suis illis presertim, que divini cultus augmentum et Christi fidelium animarum salutem conspicuit, quantum cum deo possumus favorabiliter annuamus. Exhibita siquidem nobis nuper pro parte dicti Vlrici peticio continebat, quod ipse devocionis zelo accensus ac cupiens terrena in celestia et transitoria in eterna felici comercio^a comutare, de bonis sibi a deo collatis ad laudem divini nominis unum altare in honorem beate Barbare virginis in parrochiali ecclesia sancti Laurentii opidi sancti Galli¹ dicte diocesis pro sue suorumque progenitorum animarum salute de novo fundare illudque pro uno presbitero inibi domino perpetuo servituro sufficienter dotare proponat. Quare pro parte ipsius Vlrici nobis fuit humiliter supplicatum, ut sibi faciendi premissa licenciam concedere eique quoad vixerit et deinde suis heredibus et successoribus et subsequenter illis defunctis consulibus opidi predicti, qui erunt pro tempore, ius patronatus dicti altaris et presentandi personam ydoneam ad illud, quociens vacaverit, imperpetuum reservare de speciali gratia dignaremur. Nos igitur huiusmodi supplicacionibus inclinati discretioni tue per apostolica scripta mandamus, quatinus eidem Vlrico, si et postquam ad hoc sufficientem dotem pro dicto presbitero assignaverit, huiusmodi altare in ecclesia predicta fundandi auctoritate nostra licenciam largiaris, iure tamen parrochialis ecclesie et cuiuslibet alterius in omnibus semper salvo. Et nichilominus Vlrico et suis heredibus ac successoribus, quoad vixerint, et deinde consulibus prefatis ius patronatus et presentandi personam huiusmodi ad altare predictum imperpetuum eadem auctoritate reserves. Datum Bononie² VIII kl. iulii pontificatus nostri anno primo.